ഹിമാചല്പ്രദേശിലെ മാണ്ഡിയില് മത്സരിക്കുന്ന ബിജെപി സ്ഥാനാര്ഥിയും ബോളിവുഡ് താരവുമായ കങ്കണ റണൗത്തിന്റെ ആസ്തി വിവരങ്ങള് പുറത്ത്. ചൊവ്വാഴ്ചയാണ് താരം നാമനിർദേശ പത്രിക സമർപ്പിച്ചത്. തെരഞ്ഞെടുപ്പ് സത്യവാങ് മൂലത്തിലാണ് താരം സ്വത്ത് വിവരങ്ങൾ വെളിപ്പെടുത്തിയിരിക്കുന്നത്. ആകെ 91 കോടിയിലധികം രൂപയുടെ ആസ്തി തനിക്കുണ്ട് എന്നാണ് കങ്കണ തെരഞ്ഞെടുപ്പ് നാമനിര്ദേശപത്രികയില് വ്യക്തമാക്കിയത്.
8.7 കോടി ജംഗമ സ്വത്തുക്കളും 62.9 കോടി സ്ഥാവര സ്വത്തുക്കളും ഉൾപ്പെടെ 91.5 കോടി രൂപയിലധികം ആസ്തി. 5 കോടി രൂപ വിലമതിക്കുന്ന 6.7 കിലോഗ്രാം സ്വർണാഭരണങ്ങളും 50 ലക്ഷം രൂപ വിലമതിക്കുന്ന 60 കിലോ വെള്ളിയും 3 കോടി രൂപ വിലമതിക്കുന്ന വജ്രാഭരണങ്ങളും എന്നിവയും ഉണ്ട്. രണ്ട് മേഴ്സിഡസ് ബെന്സും ഒരു ബിഎംഡബ്ല്യൂവും അടങ്ങുന്ന 3.91 കോടി രൂപ വിലമതിക്കുന്ന ലക്ഷ്വറി കാറുകള് താരത്തിന് സ്വന്തമായുണ്ട്. 21 ലക്ഷം രൂപ ഷെയര് മാര്ക്കറ്റില് കങ്കണയ്ക്കുണ്ട്. 12-ാം ക്ലാസ് വിദ്യാഭ്യാസമാണ് നാമനിര്ദേശപത്രികയില് കങ്കണ റണൗത്ത് നല്കിയിരിക്കുന്ന വിവരങ്ങളിലുള്ളത്. മുംബൈയിൽ മൂന്നു ഫ്ലാറ്റുകളും മണാലിയിൽ ഒരു ബംഗ്ലാവും ഉണ്ട്. ബാന്ദ്രയിലെ അപാർട്മെൻറിന് മാത്രം 23.98 കോടി രൂപ വില വരും. മണാലിയിലെ വസതിയുടെ മൂല്യം 7.97 കോടി രൂപയാണ്. കങ്കണ റണൗത്തിനെതിരെ മുംബൈയിലെ രണ്ട് പൊലീസ് സ്റ്റേഷനുകളില് 2 കേസുകള് രജിസ്റ്റര് ചെയ്തിട്ടുണ്ടെങ്കിലും ഒന്നിലും പ്രതിചേര്ത്തിട്ടില്ല.
