തിരുവനന്തപുരം: പൊലീസ് കേസെടുത്ത ശേഷവും ഗണ്മാന് തല്സ്ഥാനത്ത് തുടരുന്നത് നിയമവിരുദ്ധമെന്ന് കെ.സി വേണുഗോപാല്. ഡിജിപി എന്ത് നോക്കി നില്ക്കുകയാണ്? അടിച്ച് പ്രതിക്കൂട്ടിലായ ഗണ്മാന് പൂര്ണ സംരക്ഷണമാണ് നല്കുന്നത്. ആഭ്യന്തര വകുപ്പ് കയ്യാളുന്ന മുഖ്യമന്ത്രിക്കൊപ്പമാണ് ഇപ്പോഴും ഗണ്മാന്. ഇതിനെതിരെ കോടതിയെ സമീപിക്കുമെന്നും കെസി മാധ്യമങ്ങളോട് പറഞ്ഞു.
അതേസമയം, കെ.പി.സി.സി. മാര്ച്ചിനുനേരെയുണ്ടായ പൊലീസ് നടപടിക്കെതിരെ പ്രതിപക്ഷത്തിന്റെ അവകാശലംഘന നോട്ടിസ്. പ്രതിപക്ഷ നേതാവ് വി.ഡി.സതീശനെ അപായപ്പെടുത്തുകയായിരുന്നു പൊലീസിന്റെ ലക്ഷ്യമെന്ന് എ.പി.അനില്കുമാര് സ്പീക്കര്ക്ക് നല്കിയ നോട്ടിസില് ആരോപിച്ചു. കണ്ണീര്വാതകം, ജലപീരങ്കി എന്നിവ പ്രയോഗിക്കുമ്പോള് വേണ്ട നടപടിക്രമങ്ങള് പാലിച്ചില്ല. കെ.പി.സി.സി. പ്രസിഡന്റ് കെ.സുധാകരന്, പ്രതിപക്ഷനേതാവ്, എം.പിമാര്, എം.എല്.എമാര് എന്നിവര് പങ്കെടുത്ത മാര്ച്ചും യോഗവും സമാധാനപരമായിരുന്നെന്നും നോട്ടിസില് പറയുന്നു.