പാറശാല : പാറശാല ഷാരോണ് കൊലക്കേസിന്റെ വിചാരണ തമിഴ്നാട്ടിലേയ്ക്ക് മാറ്റണമെന്ന ആവശ്യം സുപ്രീംകോടതി തള്ളി. പ്രതികളായ ഗ്രീഷ്മ, ഗ്രീഷ്മയുടെ അമ്മ, അമ്മാവന് എന്നിവര് നല്കിയ ട്രാന്സ്ഫര് ഹര്ജിയാണ് ജസ്റ്റിസ് ദിപാങ്കര് ദത്ത തള്ളിയത്. കുറ്റകൃത്യം നടന്നുവെന്ന് പൊലീസ് പറയുന്നത് തമിഴ്നാട്ടിലാണ് അതിനാല് നാഗര്കോവില് ജില്ലാ സെഷന്സ് കോടതിയാണ് കേസ് പരിഗണിക്കേണ്ടതെന്ന് ഗ്രീഷ്മ അടക്കം പ്രതികളുടെ അഭിഭാഷകര് വാദിച്ചു.
ഷാരോണ് മരിച്ചത് തിരുവനന്തപുരം മെഡിക്കല് കോളേജില് ആയതുകൊണ്ടുമാത്രം കേസ് തിരുവനന്തപുരം കോടതിക്ക് പരിഗണിക്കാനാകില്ലെന്നും കുറ്റകൃത്യം നടന്ന സ്ഥലത്തെ കോടതിയാണ് കേസ് പരിഗണിക്കേണ്ടതെന്ന് ക്രിമിനല് നടപടി ചട്ടം 177–ാം വകുപ്പ് നിര്ദേശിക്കുന്നതായും അഭിഭാഷകര് ഉന്നയിച്ചു. ഇക്കാര്യങ്ങള് വിചാരണ കോടതിയിലാണ് പറയേണ്ടതെന്ന് ചൂണ്ടിക്കാട്ടിയാണ് ട്രാന്സ്ഫര് ഹര്ജി തള്ളിയത്. നെയ്യാറ്റിന്കര അഡിഷനല് ജില്ലാ സെഷന്സ് കോടതിയിലാണ് അന്വേഷണ റിപ്പോര്ട്ട് ഫയല് ചെയ്തത്.
