തിരുവനന്തപുരം: തിരുവല്ലം കസ്റ്റഡി മരണത്തില്‍ മൂന്ന് പോലീസുകാരെ പ്രോസിക്യൂട്ട് ചെയ്യാന്‍ സിബിഐ അനുമതി തേടി.
തിരുവല്ലം എസ്എച്ച്‌ഒ ആയിരുന്ന സുരേഷ് വി.നായര്‍, എസ്‌ഐ വിപിന്‍ പ്രകാശ്, ഗ്രേഡ് എസ്‌ഐ സജീവ് കുമാര്‍ എന്നിവരെയാണ് കേസില്‍ പ്രതിചേര്‍ത്തത്.
കസ്റ്റഡിയിലിരിക്കെ മരിച്ച സുരേഷിനെ ഇവര്‍ മര്‍ദിച്ചതിന് തെളിവുണ്ടെന്ന് സിബിഐ സര്‍ക്കാരിനെ അറിയിച്ചു. 2022 ഫെബ്രുവരി 28നാണ് ദമ്പതിമാരെ ആക്രമിച്ച കേസില്‍ തിരുവല്ലം പോലീസ് കസ്റ്റഡിയിലെടുത്ത സുരേഷ് മരിച്ചത്.
ജഡ്ജിക്കുന്ന് എന്ന സ്ഥലം കാണാനെത്തിയ ദമ്പതികളെ ആക്രമിച്ച ഒരു സംഘം ആളുകളെയാണ് പോലീസ് കസ്റ്റഡിയിലെടുത്തത്. പോലീസ് കസ്റ്റഡിയിലിരിക്കെ നെഞ്ചുവേദന അനുഭവപ്പെട്ട സുരേഷിനെ ആശുപത്രിയില്‍ പ്രവേശിപ്പതിന് പിന്നാലെ മരിച്ചിരുന്നു.
മര്‍ദനത്തെ തുടര്‍ന്നുണ്ടായ ഹൃദയാഘാതമാണ് മരണകാരണമെന്നായിരുന്നു പോസ്റ്റ്‌മോര്‍ട്ടം റിപ്പോര്‍ട്ട്. ആദ്യം ക്രൈംബ്രാഞ്ച് അന്വേഷിച്ച കേസ് പിന്നീട് സിബിഐക്ക് വിട്ടു. സിബിഐ തിരുവനന്തപുരം യൂണിറ്റാണ് അന്വേഷണം നടത്തിയത്.
