തിരുവനന്തപുരത്ത് കോവിഡ് ഭീതിയില്‍ ആളുകളെ ഭീഷണിപ്പെടുത്തിയ കേസില്‍ അന്വേഷണത്തിന് ഉത്തരവിട്ടു. ഗര്‍ഭിണിയായ പ്രവാസിയെ നാട്ടുകാരും അച്ഛനെയും മക്കളെയും വീട്ടുടമയും ഭീഷണിപ്പെടുത്തിയ സംഭവങ്ങളില്‍ സംസ്ഥാന മനുഷ്യാവകാശ കമ്മീഷന്‍ കേസെടുത്ത് അന്വേഷണത്തിന് ഉത്തരവിട്ടിരിക്കുന്നത്. വലിയ തുറയിലെ വാടക വീട്ടില്‍ നിന്നും കൊല്ലം സ്വദേശിയായ അച്ഛനെയും മക്കളെയും വീട്ടുടമ ഇറക്കിവിട്ടിരുന്നു. ഈ സംഭവത്തെക്കുറിച്ച് തിരുവനന്തപുരം ജില്ലാ പോലീസ് മേധാവി അന്വേഷിച്ച് അടിയന്തിര റിപ്പോര്‍ട്ട് സമര്‍പ്പിക്കണമെന്നും കമ്മീഷന്‍ ആവശ്യപ്പെട്ടു.
വാടക വീടു വിട്ടിറങ്ങിയ ഇവര്‍ ഫോര്‍ട്ട് സ്‌കൂളില്‍ അഭയം തേടിയിരുന്നു. എന്നാല്‍ ഇവരെ പിന്നീട് സാമൂഹിക നീതി വകുപ്പ് ഏറ്റെടുത്തു.ഗള്‍ഫില്‍ നിന്ന് വീട്ടിലെത്തി ക്വാറന്റയിനില്‍ കഴിഞ്ഞിരുന്ന ചിറയിന്‍കീഴ് ആനത്തലവട്ടം സ്വദേശിനിയും എട്ട് മാസം ഗര്‍ഭിണിയുമായ ആശയെ വീട്ടില്‍ നിന്നും മാറി താമസിക്കണമെന്ന് നാട്ടുകാര്‍ ഭീഷണി മുഴക്കിയ സംഭവത്തിലും തിരുവനന്തപുരം റൂറല്‍ ജില്ലാ പോലീസ് മേധാവി അന്വേഷിക്കണമെന്ന് കമ്മീഷന്‍ ആവശ്യപ്പെട്ടു.കമ്മീഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക്കിന്റേതാണ് ഉത്തരവ്. രണ്ട് റിപ്പോര്‍ട്ടുകളും ഉടന്‍ സമര്‍പ്പിക്കണം. മനുഷ്യാവകാശ പ്രവര്‍ത്തകനായ രാഗം റഹിം സമര്‍പ്പിച്ച പരാതികളിലാണ് നടപടി.
