കോട്ടയം: നവകേരള സദസ് കോട്ടയം ജില്ലയില് തുടരുന്നു. രണ്ടാം ദിനമായ ബുധനാഴ്ച കോട്ടയം ജറുസലേം മാര്ത്തോമ്മ പള്ളി ഹാളില് ഒമ്ബതിന് പ്രഭാതയോഗം നടക്കും.കോട്ടയം, ചങ്ങനാശേരി, പുതുപ്പള്ളി, കാഞ്ഞിരപ്പള്ളി, പൂഞ്ഞാര്, എറ്റുമാനൂര് നിയമസഭ മണ്ഡലങ്ങളില്നിന്നുള്ള 200 വിശിഷ്ടാതിഥികള് യോഗത്തില് പങ്കെടുക്കും.
ബുധനാഴ്ച നാല് മണ്ഡലങ്ങളിലും വ്യാഴാഴ്ച രണ്ട് മണ്ഡലങ്ങളിലും നവകേരള സദസ് നടക്കും. ഇന്ന് രാവിലെ 10ന് ഏറ്റുമാനൂരിലും ഉച്ചതിരിഞ്ഞ് രണ്ടിന് പുതുപ്പള്ളിയിലും സദസ് നടക്കും. നാലിന് ചങ്ങനാശേരിയിലും വൈകുന്നേരം ആറിന് കോട്ടയം നിയോജകമണ്ഡലത്തിലും നവകേരള സദസ് നടക്കും.
ജില്ലയിലെ അവസാനദിനമായ വ്യാഴാഴ്ച ഒമ്ബതിന് കുറവിലങ്ങാട് പള്ളി പാരിഷ് ഹാളില് പ്രഭാതയോഗം നടക്കും. തുടര്ന്ന് കടുത്തുരുത്തി നിയോജകമണ്ഡലത്തിലെ യോഗം കുറവിലങ്ങാട് ദേവമാതാ കോളജ് മൈതാനത്തില് രാവിലെ 11 ന് നടക്കും.
ഉച്ചതിരിഞ്ഞ് മൂന്നിന് വൈക്കം ബീച്ചില് നടക്കുന്ന സദസിനുശേഷം നവകേരള സദസ് ആലപ്പുഴയില് പ്രവേശിക്കും.
അതിനിടെ, എറണാകുളം ജില്ലയിലെ നാല് മണ്ഡലങ്ങളിലെ പര്യടനം ജനുവരി ഒന്നിനും രണ്ടിനും നടത്താന് തീരുമാനിച്ചു. ഒന്നിന് തൃക്കാക്കര, പിറവം മണ്ഡലങ്ങളിലും രണ്ടിന് തൃപ്പൂണിത്തുറ, കുന്നത്തുനാട് മണ്ഡലങ്ങളിലുമായിരിക്കും പര്യടനം.
സിപിഐ സംസ്ഥാന സെക്രട്ടറിയായിരുന്ന കാനം രാജേന്ദ്രന്റെ മരണംമൂലം ഇവിടങ്ങളിലെ നവകേരള സദസ് മാറ്റിയിരുന്നു.
