ഇടുക്കി ജില്ലയിലെ പീരുമേടിലെ പുളച്ചിമലയില്‍ നിന്നും ഉത്ഭവിച്ച് പത്തനംതിട്ട- ആലപ്പുഴ ജില്ലകള്‍ താണ്ടി 176 കിലോമീറ്റര്‍ നീളത്തില്‍ ഒഴുകുകയാണ് പുണ്യനദിയായ പമ്പ, പമ്പാനദിയെ ദക്ഷിണ ഭഗീരഥിയെന്നു വിളിക്കുന്നു ഈ നദി ഒടുവില്‍ വേമ്പനാട്ട് കായലില്‍ സംഗമിക്കുന്നു. മറ്റൊരു കൈവഴി കരുവാറ്റ വഴി നേരിട്ട് തോട്ടപ്പള്ളി സ്പില്‍വേയിലേക്ക് ഒഴുകുന്നു. 43 ഗ്രാമപഞ്ചായത്തുകളുടെ . അധികാരപരിധിയില്‍ കൂടിയാണ് നദി ഒഴുകുന്നത്.
പമ്പാനദി ഇന്ന് നാശത്തിന്റെ വക്കിലാണ്. കയ്യേറ്റം. ലിനീകരണം.കൂടാതെ കിഴക്കന്‍ വെള്ളപ്പാച്ചിലില്‍ വന്ന് അടിഞ്ഞുകൂടുന്ന എക്കല്‍ ചെളി കാരണം നദിയുടെ നല്ലൊരു ഭാഗവും കരയായി മാറി.ഏറ്റവും കൂടുതല്‍ ഭീഷണി നേരിടുന്ന ഭാഗം ആലപ്പുഴ ജില്ലയിലെ ചെങ്ങന്നൂര്‍ താലൂക്കിന്റെ പരിധിയില്‍ വരുന്ന പാണ്ടനാട് നാക്കടകടവ് മുതല്‍ ഇല്ലിമല വഴി ഒഴുകി തിരുവതാംകൂര്‍ ദേവസ്വം ബോര്‍ഡ് പമ്പ കോളേജിന് സമീപത്തുകൂടി പന്നായി കടവില്‍ വന്ന് വീണ്ടും പമ്പയുമായി സംഗമിക്കുന്ന കൈവഴി ഏതാണ്ട് ഒഴുക്ക് നിലച്ചു കൊണ്ടിരിക്കുകയാണ്,
ഈ നദിയുടെ പല ഭാഗങ്ങളും ചെളി അടിഞ്ഞ് നികന്ന് കരയായി മാറി .ഈ കൈവഴിയിലാണ് കുട്ടംപേരൂര്‍ ആറ് സംഗമിക്കുന്നത്. ഇത് പമ്പയുടെ ഒരു കൈവഴിയാണ് കുട്ടംപേരൂര്‍ ആറ്റില്‍ നീരൊഴുക്ക് വര്‍ദ്ധിപ്പിക്കണമെങ്കില്‍ പമ്പയുടെ കൈവഴിയിലെ എക്കല്‍ ചെളികള്‍ നീക്കി ആഴം കൂട്ടി നദി നവീകരിക്കണം, പന്നായികടവ് മുതല്‍ പടിഞ്ഞാട്ട് മുല്ലശ്ശേരികടവ് – ബംഗ്ലാവില്‍പടി മുതല്‍ തുടര്‍ന്ന് പടിഞ്ഞാട്ട് ഏതാണ്ട് വീയപുരം ഭാഗം വരെ നദിയുടെ തെക്കേക്കര ഭാഗം പൂര്‍ണ്ണമായും എക്കല്‍ ചെളി അടിഞ്ഞുകൂടി നികന്നിരിക്കുകയാണ്
ഈ പ്രദേശങ്ങളില്‍ പൊതുജനങ്ങള്‍ ഉപയോഗപ്പെടുത്തി വന്ന കുളിക്കടവുകള്‍ ഉപയോഗശൂന്യമായി മാറി. പന്നായികടവ് മുതല്‍ പടിഞ്ഞാട്ട് നദിയുടെ തെക്കേക്കര ഭാഗത്ത് എക്കല്‍ ചെളി വന്ന് അടിഞ്ഞു കൂടുവാന്‍ കാരണം അരികുപുറം ബംഗ്ലാവില്‍ പടിഭാഗത്തുള്ള മൂന്നു പുലിമുട്ടുകള്‍ സ്ഥാപിച്ചതാണ് ഈ പുലിമുട്ടുകള്‍ നദിയുടെ ഒഴുക്കിന്റെ ഗതിയെ മാറ്റി വിടുന്നു. ചില സ്വകാര്യ വ്യക്തികളുടെ താല്‍പര്യത്തിനു വേണ്ടി 1961-ല്‍ സ്ഥാപിച്ചതാണ് ഈ പുലിമുട്ടുകള്‍,ഈ പുലിമുട്ടുകള്‍ നീക്കം ചെയ്താല്‍ മാത്രമേ നദിയുടെ തെക്കേക്കര ഭാഗത്തെ ഒഴുക്ക് വര്‍ദ്ധിപ്പിക്കുവാന്‍ കഴിയൂ, ഒഴുക്കില്ലാത്ത കാരണത്താലാണ് നദിയുടെ തെക്കേക്കര ഭാഗം കിലോമീറ്റര്‍ ഓളം ചെളി അടിഞ്ഞുകൂടി നികന്നത്, കാര്‍ത്തികപ്പള്ളി, കുട്ടനാട്, അമ്പലപ്പുഴതാലൂക്കുകളുടെ പല ഭാഗങ്ങളും നദി ഈ രീതിയില്‍ നികന്നു കൊണ്ടിരിക്കുന്നു,
15 വര്‍ഷങ്ങള്‍ക്ക് മുമ്പ് വരെ ചെങ്ങന്നൂര്‍ – മാന്നാര്‍ പ്രദേശങ്ങളിലേക്ക് പമ്പാനദിയില്‍ കൂടി സംസ്ഥാന ജലഗതാഗത വകുപ്പിന്റെ ബോട്ട് സര്‍വ്വീസ് ഉണ്ടായിരുന്നു. ഈ സര്‍വീസുകള്‍ നിലച്ചതോടുകൂടി നദിയില്‍ ഓളങ്ങള്‍ ഇല്ലാതാക്കുകയും പല രീതിയിലുള്ള സസ്യങ്ങള്‍ വളരുകയും ചെയ്തു, ഇത് ഉള്‍നാടന്‍ മത്സ്യബന്ധന മേഖലയെ കാര്യമായി ബാധിച്ചിട്ടുണ്ട്, നദിയിലെ മലിനീകരണവും മറ്റും കാരണങ്ങള്‍ കൊണ്ടും ഒട്ടനവധി മത്സ്യങ്ങള്‍ നദിയില്‍ നിന്നും എന്നെന്നേക്കുമായി ഇല്ലാതായി. ഇരുന്നൂറോളം ഇനത്തില്‍പ്പെട്ട മത്സ്യങ്ങള്‍ ഇപ്പോള്‍ പമ്പാനദിയില്‍ ഇല്ലെന്നാണ് ചില പഠനങ്ങള്‍ വ്യക്തമാക്കുന്നത്.
മുമ്പ് നടന്ന ഒരു പഠനത്തില്‍ അപകടകാരിയായ ബാക്ടീരിയയുടെ അളവ് നദിയില്‍ വര്‍ദ്ധിച്ചതായി കണ്ടെത്തിയിരുന്നു. പമ്പ മുതല്‍ തകഴി വരെയുള്ള ഭാഗങ്ങള്‍ ആണ് പഠനത്തിന് ഉപയോഗപ്പെടുത്തിയത്. ഗവേഷകനായ ഡോ: സി , പി രാജേന്ദ്രന്റെ പഠനത്തില്‍ 280 കൈവഴികളാണ് പമ്പയ്ക്കുള്ളതെന്നും കണ്ടെത്തിയിരുന്നു.
ഇപ്പോള്‍ പറയത്തത്ര കൈവഴികള്‍ ഒന്നും പമ്പയ്ക്കില്ല. പമ്പാനദിയുടെ അവസ്ഥ ഇന്ന് വളരെ പരിതാപകരമാണ്, വീയപുരം വരെയുള്ള ഭാഗങ്ങളില്‍ നദിയില്‍ ഉപ്പുവെള്ളത്തിന്റെ സാന്നിധ്യം ഉള്ളതായി കര്‍ഷകര്‍ പറയുന്നു. ഇത് കുട്ടനാട്ടിലെയും, അപ്പര്‍കുട്ടനാടന്‍ മേഖലകളിലെയും കാര്‍ഷിക മേഖലയെ കാര്യമായി ബാധിക്കും. പമ്പാനദിയുടെ തീരങ്ങളിലെ കയ്യേറ്റങ്ങള്‍ ഒഴിപ്പിക്കുകയും,നദിയെ മാലിന്യപ്പെടുത്തുന്നത് തടയുകയും,നികന്ന് അടിഞ്ഞ പ്രദേശങ്ങള്‍ മുഴുവന്‍ നവീകരിച്ച് നീരൊഴുക്ക് വര്‍ദ്ധിപ്പിച്ചാല്‍ പ്രളയക്കെടുതികള്‍ ഒരു പരിധിവരെ തടയുവാന്‍ കഴിയും.
റിപ്പോര്‍ട്ട് : നൗഷാദ് മാന്നാര്‍
