കൊച്ചി: കാലടിയില്‍ തൊഴിലുറപ്പ് തൊഴിലാളികള്‍ക്കു നേരെ കാട്ടാനക്കൂട്ടത്തിന്‍റെ ആക്രമണം. ഭയന്നോടിയ ഒരാള്‍ക്ക് പരിക്കേറ്റു.കാലടി പ്ലാന്‍റേഷൻ പതിനാറാം ബ്ലോക്കിലാണ് സംഭവം. പാണ്ടുപാറ സ്വദേശി ബിജുവിനാണ് പരിക്കേറ്റത്.
ഇന്നുരാവിലെ തൊഴിലുറപ്പ് തൊഴിലാളികള്‍ പ്ലാന്‍റേഷനില്‍ ടാപ്പിംഗിനെത്തിയപ്പോഴാണ് പതിനാറാം ബ്ലോക്കില്‍ തമ്പടിച്ച കാട്ടാനക്കൂട്ടം തൊഴിലാളികളെ വിരട്ടിയോടിച്ചത്. പലഭാഗത്തായി തൊഴിലാളികള്‍ ചിതറിയോടി. ഇതിനിടെ മരത്തില്‍ തട്ടി വീണാണ് ബിജുവിന് പരിക്കേറ്റത്. ഇയാളെ അങ്കമാലിയിലെ ആശുപത്രിയില്‍ പ്രവേശിപ്പിച്ചു. തലയ്ക്കു പരിക്കേറ്റ ബിജുവിന്‍റെ നില തൃപ്തികരമാണ്.
ആനക്കൂട്ടം ഇപ്പോഴും തോട്ടത്തില്‍ തന്നെയുണ്ടെന്നാണ് വിവരം. നേരത്തെയും പ്ലാന്‍റേഷൻ കോർപറേഷന്‍റെ കീഴിലുള്ള ഫാമില്‍ തൊഴിലാളികള്‍ക്കു നേരെ കാട്ടാനയുടെ ആക്രമണമുണ്ടായിരുന്നു.
