കൊച്ചി: രണ്ട് ദിവസത്തെ സന്ദര്‍ശനത്തിനായി പ്രധാനമന്ത്രി നരേന്ദ്ര മോദി കൊച്ചിയിലെത്തി. നെടുന്പാശേരി വിമാനതാവളത്തിലാണ് പ്രധാനമന്ത്രി എത്തിയത്.നടനും ബിജെപി നേതാവുമായ സുരേഷ് ഗോപിയുടെ മകളുടെ വിവാഹത്തില്‍ പങ്കെടുക്കുന്നതിനായാണ് പ്രധാനമന്ത്രി കേരളത്തിലെത്തിയത്.
നെടുമ്പാശ്ശേരിയില്‍ നിന്ന് കൊച്ചി നാവികസേനാ താവളത്തിലേക്കാണ് മോദി പോകുക. കൊച്ചി എംജി റോഡില്‍ പ്രധാനമന്ത്രി ചൊവ്വാഴ്ച റോഡ് ഷോ നത്തും. ഗവര്‍ണര്‍ ആരിഫ് മുഹമ്മദ് ഖാൻ, കേന്ദ്ര മന്ത്രി വി. മുരളീധരൻ, ജില്ലാ കളക്ടര്‍ എൻ.എസ്.കെ. ഉമേഷ് എന്നിവര്‍ ചേര്‍ന്നാണ് പ്രധാനമന്ത്രിയെ വിമാനതാവളത്തില്‍ സ്വീകരിച്ചത്.
ബുധനാഴ്ച ഗുരുവായുര്‍ ക്ഷേത്രത്തില്‍ നടക്കുന്ന വിവാഹ ചടങ്ങിലാണ് നരേന്ദ്ര മോദി പങ്കെടുക്കുക. തൃപ്രയാര്‍ ശ്രീരാമസ്വാമി ക്ഷേത്രത്തിലും പ്രധാനമന്ത്രി ദര്‍ശനം നടത്തുമെന്ന് അറിയിച്ചിട്ടുണ്ട്. പ്രധാനമന്ത്രിയുടെ സന്ദര്‍ശനം കണക്കിലെടുത്ത് വൻ സുരക്ഷാ ക്രമീകരണങ്ങളാണ് ഗുരുവായൂരിലും തൃപ്രയാറിലും ഒരുക്കിയിട്ടുള്ളത്.
