കൊച്ചി : സ്ത്രീകളുടെ കഴിവുകളെ പ്രയോജനപ്പെടുത്തി സ്വയം പര്യാപ്തതയിലേക്ക് നയിക്കുന്നതിനുള്ള പ്രവര്‍ത്തനങ്ങളാണ് ജില്ലാ പഞ്ചായത്തിന്റെ നേതൃത്വത്തില്‍ നടന്നുവരുന്നതെന്ന് ജില്ലാ പഞ്ചായത്ത് പ്രസിഡന്റ് മനോജ് മൂത്തേടന്‍ പറഞ്ഞു.വനിത സംരംഭകത്വ പദ്ധതി ധനസഹായ വിതരണവും ന്യൂട്രി മിക്‌സ് സംരംഭക യൂണിറ്റുകള്‍ക്കുള്ള ധനസഹായ വിതരണവും പെണ്ണെഴുത്ത് പുസ്തക വിതരണവും ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ഏത് മേഖലയിലും കടന്ന് ചെന്ന് വിജയം കൈവരിക്കാന്‍ കഴിയുന്നവരാണ് സ്ത്രീകള്‍. പഴയകാലത്ത് നിന്ന് വ്യത്യസ്തമായി ഇന്ന് സമൂഹത്തിന്റെ എല്ലാ മേഖലകളിലും സ്ത്രീകളെ കാണാന്‍ കഴിയുന്നുണ്ടെന്നും അദ്ദേഹം പറഞ്ഞു. ജില്ലാ പഞ്ചായത്ത് പ്രിയദര്‍ശിനി ഹാളില്‍ നടന്ന ചടങ്ങില്‍ ജില്ലാ പഞ്ചായത്ത് വൈസ് പ്രസിഡന്റ് എല്‍സി ജോര്‍ജ് അദ്ധ്യക്ഷത വഹിച്ചു, എഴുത്തുകാരി തനുജ ഭട്ടതിരി മുഖ്യ പ്രഭാഷണം നടത്തി.
ജില്ലാ പഞ്ചായത്തിന്റെ വാര്‍ഷിക പദ്ധതിയുടെ ഭാഗമായി വനിത സംരഭകത്വ പദ്ധതിയുടെ ഭാഗമായി 15 വനിത യൂണിറ്റുകള്‍ക്കാണ് ധനസഹായ വിതരണം ചെയ്തത് .10 കുടുംബശ്രീ ന്യൂട്രിമിക്‌സ് യൂണിറ്റുകള്‍ക്കും ധനസഹായ വിതരണ ചെയ്തു.പെണ്ണെഴുത്ത് പദ്ധതിയുടെ ഭാഗമായുള്ള 15 കഥകള്‍ എന്ന പുസ്തകത്തിന്റെ വിതരണവും സംഘടിപ്പിച്ചു.ജില്ലാ പഞ്ചായത്ത് മുതിര്‍ന്ന അംഗം ശാരദ മോഹനെ ചടങ്ങില്‍ ആദരിച്ചു.
ജില്ലാ പഞ്ചായത്ത് മുന്‍ പ്രസിഡന്റ് ഉല്ലാസ് തോമസ്, ക്ഷേമകാര്യ സ്ഥിരം സമിതി ചെയര്‍മാന്‍െ കെ ജി ഡോണോ മാസ്റ്റര്‍, ജില്ലാ പഞ്ചായത്ത് അംഗങ്ങളായ സനിത റഹീം, ഷൈനി ജോര്‍ജ്, എ എസ് അനില്‍കുമാര്‍, റാണിക്കുട്ടി ജോര്‍ജ്, ഷൈമി വര്‍ഗീസ് , ലിസി അലക്‌സ്, അനിത ടീച്ചര്‍, അനിമോള്‍ ബേബി , ഉമ മഹേശ്വരി, ജില്ലാ പഞ്ചായത്ത് സെക്രട്ടറി പി. എസ് ഷിനോ എന്നിവര്‍ പങ്കെടുത്തു.
