മുവാറ്റുപുഴ: കോവിഡിന്റെ രണ്ടാം വ്യാപനം ശക്തിപ്പെട്ട സാഹചര്യത്തില് മുവാറ്റുപുഴ നഗരത്തില് കര്ശന നിയന്ത്രണം ഏര്പ്പെടുത്തും. കോവിഡ് മാനദണ്ഡങ്ങള് പാലിക്കുന്നുണ്ടെന്ന് ഉറപ്പു വരുത്താന് നഗരസഭാ ജീവനക്കാരും പോലീസും സംയുക്ത പരിശോധന നടത്തും. മാനദണ്ഡങ്ങള് ലംഘിക്കുന്നവര്ക്കെതിരെ കര്ശന നടപടി സ്വീകരിക്കും. പോലീസിന്റെ നിര്ദ്ദേശങ്ങള് പാലിക്കാതെ പ്രവര്ത്തിക്കുന്ന വ്യാപാര സ്ഥാപനങ്ങള്ക്കെതിരെ നഗരസഭാ ചട്ടം അനുസരിച്ചുള്ള നടപടി സ്വീകരിക്കും. നഗരസഭാ ചെയര്മാന് പി.പി എല്ദോസിന്റെ അധ്യക്ഷതയില് ചേര്ന്ന ഉന്നതതല സമിതിയാണ് തീരുമാനം എടുത്തത്.
രണ്ട് ദിവസത്തിനകം 28 വാര്ഡിലും ദ്രുത കര്മ്മ സേനയുടെയും വാര്ഡ് തല ജാഗ്രതാ സമിതിയുടെയും സംയുക്ത യോഗം ചേര്ന്ന് കര്മ്മ പരിപാടികള് സ്വീകരിക്കും. അടിയന്തര ഘട്ടം ഉണ്ടായാല് ജനറല് ആശുപത്രിക്ക് പുറമെ ആയുര്വേദ, ഹോമിയോ ആശുപത്രികളിലും സി.എഫ്.എല്.ടി.സികള് തുറക്കും കോവിഡ് ബാധിതര്ക്കും നിരീക്ഷണത്തില് കഴിയുന്നവര്ക്കും ആവശ്യക്കാര്ക്ക് നഗരസഭ സൗജന്യമായി ഭക്ഷണം എത്തിച്ചു നല്കും.
കോവിഡ് സ്ഥിതീകരിക്കുന്നവരെ ചികിത്സാ കേന്ദ്രത്തില് എത്തിക്കുന്നതിന് സൗജന്യമായി വാഹന സൗകര്യം ഒരുക്കും. വാക്സിന് ലഭ്യതയ്ക്ക് അനുസരിച്ച് വിവിധ കേന്ദ്രങ്ങളില് കുത്തിവയ്പ്പ് ക്യാമ്പ് നടത്തും. ഒരു വാര്ഡില് ഒരു ക്യാമ്പ് എന്നതാണ് ലക്ഷ്യമിടുന്നത്. ആയുര്വേദ ആശുപത്രിയോടനുബന്ധിച്ച് പ്രവര്ത്തിക്കുന്ന ആയുര് രക്ഷാ ക്ലിനിക്കില് ചികിത്സയും പ്രതിരോധ മരുന്ന് വിതരണവും ആരംഭിക്കും. നൂറുപേര്ക്ക് പ്രതിദിനം പ്രതിരോധ മരുന്നുകള് വിതരണം ചെയ്യും.
ഹോമിയോ പ്രതിരോധ ഗുളികകളുടെ വിതരണവും നടത്തും. നിലവില് 15, 000 പേര്ക്ക് നല്കാനുള്ള ഗുളിക സ്റ്റോക്കുണ്ട് കൂടുതല് വേണ്ടിവന്നാല് നഗരസഭ പണം കൊടുത്ത് വാങ്ങി നല്കും വാര്ഡ് തല ധ്രുത കര്മ്മസേന പ്രതിരോധ മരുന്ന് വീടുകളില് എത്തിച്ച് നല്കും. കോവിഡ് വ്യാപനം തടയുന്നതിന്റെ ഭാഗമായി നഗരത്തില് പ്രവര്ത്തിക്കുന്ന എല്ലാ സ്വകാര്യ സര്ക്കാര് ആശുപത്രികളിലും സന്ദര്ശകരെ നിയന്ത്രിക്കും.
ബോധവല്ക്കരണത്തിന്റ ഭാഗമായി നഗരസഭയും പോലീസും ഉച്ചഭാഷിണിയിലൂടെ നിര്ദ്ദേശങ്ങള് നല്കും ഇതര ഭാഷകളിലും അനൗണ്സ്മെന്റ് നടത്തും ശുചീകരണ പ്രവര്ത്തനങ്ങള് കാര്യക്ഷമമാക്കും. വ്യാപാര സ്ഥാപനങ്ങള് രാത്രി 9 നു ശേഷം തുറന്ന് പ്രവര്ത്തിക്കാന് അനുവദിക്കില്ല. റോഡുകളിലും പൊതു സ്ഥലങ്ങളിലും സ്ഥാപനങ്ങളിലും കോവിഡ് മാനദണ്ഡം ലംഘിക്കുന്നവര്ക്കെതിരെ കര്ശന നടപടി സ്വീകരിക്കും. ഇതര സംസ്ഥാനങ്ങളില് നിന്ന് നഗരത്തിലെത്തുന്ന വാഹനങ്ങളുടെ കൃത്യമായ വിവരം പോലിസ് ശേഖരിക്കും.
യാത്രക്കാരെയും വാഹന ജീവനക്കാരെയും നിരീക്ഷിക്കും. അഥിതി തൊഴിലാളികള് കൂട്ടം കൂടുന്നത് ഒഴിവാക്കും. നഗരത്തിന്റെ വിവിധ കേന്ദ്രങ്ങളില് അതി രാവിലെ അതിഥി തൊഴിലാളികള് കൂട്ടം കൂടുന്നത് ശ്രദ്ധയില് പെട്ടിട്ടുണ്ട് ഇതിനെതിരെ കര്ശന നടപടി സ്വീകരിക്കും ബസ് ഓട്ടോ സ്റ്റാണ്ടുകളിലും ബസ് സ്റ്റോപ്പുകളിലും സാമൂഹിക അകലം പാലിക്കാത്തവര്ക്ക് എതിരെ നടപടി സ്വീകരിക്കും സ്വകാര്യ ചടങ്ങുകള് നടത്തുന്നതിന് രജിസ്ട്രേഷന് നിര്ബന്ധമാക്കും.
