ജീന് ലൂക്കിന് ഇന്ത്യന് പുരാണ കഥകള് പരിചയപ്പെടുത്തിയത് പോണ്ടിച്ചേരിയില് നിന്നും ഫ്രാന്സിലെത്തിയ ഒരു സോഷ്യോളജി പ്രൊഫസറാണ്. പഞ്ചതന്ത്രവും മഹാഭാരതത്തിലെ ഉപകഥകളും അന്നു മുതല് കൂടുതലായി വായിച്ചു തുടങ്ങിയ ജീന് ലൂക്കിന് തുറന്നു കിട്ടിയത് കല്പ്പിത കഥകളുടെ മായാലോകം. ഇപ്പോള് എഴുപതുകാരനായ ജീന് ജീവിതത്തിന്റെ പകുതിയോളം അദ്ധ്യാപകനായും ഇലക്ട്രീഷ്യനായും ജോലി ചെയ്തിരുന്നു. ഈ പുരാണ കഥകളെ അടുത്തറിഞ്ഞതോടെ അവയുടെ ദൃശ്യഭാഷ ഒരുക്കുന്നതാണ് തന്റെ ജീവിതലക്ഷ്യമെന്ന് തിരിച്ചറിഞ്ഞുവെന്നും അത് തന്റെ രണ്ടാം ജന്മമായെന്നും ജീന് ലൂക്ക് പറയും.
ഈ നാടോടി നാടകങ്ങളുമായി ഫ്രാന്സിനെക്കൂടാതെ റഷ്യ, പോളണ്ട്, മൊറോക്കോ, അല്ജീരിയ തുടങ്ങി പന്ത്രണ്ടിലേറെ രാജ്യങ്ങളില് സഞ്ചരിച്ചിട്ടുണ്ട് ഇദ്ദേഹം. മൂവാറ്റുപുഴ സ്വകാര്യ ആശുപത്രിയില് ആയുര്വേദ ചികിത്സയ്ക്കായി എത്തിയതാണ് ജീന് ലൂക്ക്. ആശുപത്രിയുടെ നടുമുറ്റത്ത് ക്ഷണിക്കപ്പെട്ട അതിഥികള്ക്ക് മുന്പില് ഒരു മണിക്കൂര് നീണ്ട അവതരണത്തില് കുരുടനും ആനയും, സിംഹവും ആട്ടിന്കുട്ടിയും, നാരായണന്റെ കഥ, ഇന്ത്യന് പക്ഷി, ഭിക്ഷക്കാരനും രാജാവും തുടങ്ങി പത്തോളം ലഘുനാടകങ്ങളാണ് അവതരിപ്പിച്ചത്. ഓരോ ലഘു അവതരണങ്ങളുടെയും ഇടവേളകളില് സംഗീതാത്മകമായി അവതരിപ്പിക്കപ്പെട്ട ഫ്രഞ്ച് നാടോടിസംഗീതവും വ്യത്യസ്താനുഭവമായിരുന്നു.
ഐതീഹ്യങ്ങളുടെ മേശവലിപ്പ് എന്നര്ത്ഥം വരുന്ന Tiroir of affabulations എന്ന പേരില് ഫ്രാന്സിലെ സിറ്റി ഓഫ് ലാവലില് ഒരു തിയേറ്റര് സ്വന്തമായുള്ള ജീന് ലൂക്കിന് ഇന്ത്യന് പുരാണങ്ങളെപ്പറ്റി പറയുമ്പോള് ആയിരം നാവാണ്. അമേച്വര് നാടകകൃത്തും സംവിധായകനുമായ മൂവാറ്റപുഴ കൊന്നയ്ക്കല് ശിവദാസന് നമ്പൂതിരി ജീന് ലൂക്കിനെ പൊന്നാടയണിയിച്ച് ആദരിച്ചു.
