കോഴിക്കോട്: സംവിധായകന്‍ വി.എം. വിനു തദ്ദേശ തെരഞ്ഞെടുപ്പില്‍ യു.ഡി.എഫ് സ്ഥാനാര്‍ഥിയാകും. കോഴിക്കോട് കോർപറേഷനിൽ കോൺഗ്രസിന്‍റെ സിറ്റിങ് സീറ്റായ കല്ലായി ഡിവിഷനിലാണ് (37-ാം വാര്‍ഡ്) വി.എം. വിനു മത്സരിക്കുന്നത്. കോര്‍പറേഷനിലെ രണ്ടാം കോണ്‍ഗ്രസ് സ്ഥാനാര്‍ഥി പട്ടികയിലാണ് അദ്ദേഹം ഉള്‍പ്പെട്ടിരിക്കുന്നത്. 15 ഡിവിഷനുകളിലെ സ്ഥാനാര്‍ഥികളെ വ്യാഴാഴ്ചയാണ് പ്രഖ്യാപിച്ചത്. കെ.പി.സി.സി ജനറല്‍ സെക്രട്ടറി അഡ്വ. പി.എം. നിയാസ് പാറോപ്പടി ഡിവിഷനില്‍ മത്സരിക്കും.
“രാഷ്ട്രീയക്കാരനല്ലാത്തതിനാൽ മറ്റുള്ളവരുടെ ഭരണം മോശമെന്ന് വിലയിരുത്തുന്നില്ല. എന്നാൽ, കോഴിക്കോടിന് വികസനമുരടിപ്പുണ്ടെന്നത് വസ്തുതയാണ്. ഒരു കോഴിക്കോട്ടുകാരനെന്ന നിലയിലാണ് ഇത് പറയുന്നത്. ചെറുപ്പംമുതൽ കോഴിക്കോടിന്റെ പൾസ് അറിയാം. മിഠായിത്തെരുവും കല്ലായിയും ഇഷ്ട ഇടങ്ങളാണ്. കല്ലായിപ്പുഴ നശിക്കുന്നതിൽ എന്നും ഉത്കണ്ഠപ്പെട്ടിട്ടുണ്ട്. കോഴിക്കോടിനുവേണ്ടി എന്തെങ്കിലും ചെയ്യാനാവുമെന്നാണ് പ്രതീക്ഷ” -സ്ഥാനാർഥിപ്രഖ്യാപനത്തിനുശേഷം വി.എം. വിനു പറഞ്ഞു.
പ്രമുഖ എഴുത്തുകാരനും നാടകപ്രവര്‍ത്തകനുമായ വിനയന്റെ മകനായ വിനു ചെറുപ്പകാലത്തുതന്നെ നാടകപ്രവര്‍ത്തനത്തില്‍ സജീവമായിരുന്നു. പിന്നീട് സിനിമയിലെത്തി. ബാലേട്ടന്‍, വേഷം, ബസ് കണ്ടക്ടര്‍, പല്ലാവൂര്‍ ദേവനാരായണന്‍, മയിലാട്ടം, ആകാശത്തിലെ പറവകള്‍ തുടങ്ങി നിരവധി ഹിറ്റ് ചിത്രങ്ങൾ സംവിധാനം ചെയ്തു.
