കൊച്ചി: കൊച്ചി പള്ളുരുത്തി സെന്റ് റീത്താസ് ഹൈസ്കൂളിൽ ശിരോവസ്ത്രം ധരിക്കുന്നതിൽ വിദ്യാർത്ഥിനിക്ക് വിലക്ക് എന്ന വിവാദത്തിൽ ഭിന്നിപ്പ് ഉണ്ടാക്കാൻ ശ്രമം നടക്കുന്നുവെന്ന് ഹൈബി ഈഡൻ എംപി. സ്കൂളിന്റെ നിയമാവലി പാലിക്കാമെന്നും തുടർന്നും കുട്ടിയെ ഈ സ്കൂളിൽ പഠിപ്പിക്കാനാണ് ആഗ്രഹമെന്നും കുട്ടിയുടെ പിതാവ് പറഞ്ഞതായി ഹൈബി ഈഡൻ വ്യക്തമാക്കി.
ഹിജാബ് ധരിക്കണമെന്ന വിദ്യാർത്ഥിയുടെ ആവശ്യത്തെച്ചൊല്ലിയുണ്ടായ സംഘർഷത്തെത്തുടർന്ന് രണ്ട് ദിവസം അവധി പ്രഖ്യാപിച്ച് എറണാകുളത്ത് ലാറ്റിൻ കത്തോലിക്കാ സഭ നടത്തുന്ന സിബിഎസ്ഇ സ്കൂൾ. സ്ഥിതിഗതികൾ ലഘൂകരിക്കേണ്ടതിന്റെ ആവശ്യകത ചൂണ്ടിക്കാട്ടിയാണ് പി.ടി.എ യോഗത്തെത്തുടർന്ന്, തിങ്കളാഴ്ചയും ചൊവ്വാഴ്ചയും സ്കൂളിന് അവധി പ്രഖ്യാപിച്ചത്.
“സാഹചര്യം മൂലമുണ്ടായ മാനസിക സമ്മർദ്ദം കണക്കിലെടുത്തും നിരവധി അധ്യാപകരും അനധ്യാപക ജീവനക്കാരും അവധിയിൽ പ്രവേശിച്ചതിനാലുമാണ്” തീരുമാനമെടുത്തതെന്ന് ഒക്ടോബർ 12 ന് മാതാപിതാക്കൾക്ക് അയച്ച കത്തിൽ പ്രിൻസിപ്പൽ സീനിയർ ഹെലീന ആൽബി പറഞ്ഞു. തർക്കത്തെക്കുറിച്ച് നേരിട്ട് പരാമർശിക്കാത്ത കത്തിൽ, “സ്കൂൾ അനുവദിക്കാത്ത വസ്ത്രം ധരിച്ച് വന്ന ഒരു വിദ്യാർത്ഥിയെന്ന്” പരാമർശിക്കുന്നുണ്ട്.
സ്കൂളിന്റെ നിയമാവലി അംഗീകരിക്കുന്നുവെന്ന് കുട്ടിയുടെ പിതാവ് അനസ് പറഞ്ഞു. ഹൈബി ഈഡൻ എം പിയുടെയും ഡിസിസി പ്രസിഡന്റ് മുഹമ്മദ്‌ ഷിയാസിന്റെയും മധ്യസ്ഥതയിൽ രക്ഷിതാവും സ്കൂൾ മാനേജ്മെന്റ് പ്രതിനിധികളും തമ്മിൽ നടത്തിയ ചർച്ചക്ക് ശേഷമായിരുന്നു പ്രതികരണം. സ്കൂൾ നിർദേശിക്കുന്ന യൂണിഫോം ധരിക്കാൻ തയ്യാറാണെന്നും വർഗീയവാദികൾക്ക് ഇടം ഉണ്ടാക്കിക്കൊടുക്കില്ലെന്നും അനസ് വ്യക്തമാക്കി. കുട്ടി നാളെ സ്കൂളിൽ വരും. ബിജെപി ആർ എസ് എസ് ശക്തികൾ ബോധപൂർവം പ്രശ്നം ഉണ്ടാക്കാൻ ശ്രമിച്ചെന്നും വർഗീയമായ ഭിന്നിപ്പ് ഉണ്ടാക്കാൻ ആരെയും അനുവദിക്കില്ലെന്നും ഹൈബി ഈഡൻ എം പി പറഞ്ഞു. പ്രിൻസിപ്പൽ അടക്കമുള്ളവർ സ്കൂളിൽ ഉണ്ടായിരുന്നില്ല. അവരുടെ അഭിപ്രായം കൂടി കേട്ട ശേഷമാകും സ്കൂൾ മാനേജ്‌മെന്റിന്റെ ഭാഗത്തു നിന്നുള്ള വിശദീകരണം.
