സംസ്ഥാനത്തെ സർവ്വകലാശാലകളെ ചാൻസലർ കൂടിയായ ഗവർണർ കാവിവൽക്കരിക്കുന്നുവെന്ന് ആരോപിച്ച് ഇടത്, യുവജന, വിദ്യാർത്ഥി സംഘടനകൾ നടത്തുന്ന പ്രതിഷേധം സംഘർഷത്തിൽ. തിരുവനന്തപുരത്ത് കേരളാ സർവകലാശാല ആസ്ഥാനത്ത് വൻ പ്രതിഷേധം. ഗവർണറുടെ നടപടികൾക്കെതിരെ പ്രതിഷേധ മാർച്ച് നടത്തിയ എസ് എഫ് ഐ പ്രവർത്തകർ കവാടം തള്ളിത്തുറന്ന് ആസ്ഥാനത്തേക്ക് കയറി. സെനറ്റ് ഹാളിനുള്ളിലേക്ക് കടന്ന് പ്രവർത്തകർ പ്രതിഷേധിക്കുകയാണ്.
കാലിക്കറ്റ്, കണ്ണൂർ സർവകലാശാലകളിലേക്കും രാവിലെ എസ്എഫ്ഐ നടത്തിയ മാർച്ചിൽ സംഘർഷമുണ്ടായി. തിരുവനന്തപുരത്തും കോഴിക്കോടും പോലീസ് ബാരിക്കേഡ് മറികടന്ന പ്രവര്‍ത്തകര്‍ സര്‍വകലാശാല കെട്ടിടത്തിനകത്തേക്ക് കയറി. ഇവിടെയും പൊലീസിന്‍റെ ഭാഗത്ത് നിന്ന് സമരക്കാര്‍ക്കു നേരെ കാര്യമായ ചെറുത്ത് നില്‍പ്പുണ്ടായില്ല.
