ജൂണ് എട്ടുമുതല് ആരാധനാലയങ്ങള് തുറന്ന് പ്രവര്ത്തിക്കുന്നതിനുള്ള മാര്ഗ്ഗരേഖ കേന്ദ്ര ആഭ്യന്തര മന്ത്രാലയം പുറത്തിറക്കി.
മാർഗ്ഗനിർദ്ദേശങ്ങൾ ഇവയെല്ലാം-
- ആരാധനാലയത്തിലെ വിഗ്രഹത്തിലോ, പരിശുദ്ധ ഗ്രന്ഥങ്ങളിലോ തൊടാന് ഭക്തരെ അനുവദിക്കരുത്
- പ്രസാദം, തീര്ത്ഥം എന്നിവ ആരാധനാലയത്തിനുള്ളില് നല്കാന് പാടില്ല
- സമൂഹ പ്രാര്ത്ഥനയ്ക്ക് സ്വന്തം പായകൊണ്ടു വരണം. എല്ലാവര്ക്കും ആയി ഒരു പായ അനുവദിക്കില്ല
- കൊവിഡ് രോഗലക്ഷണം ഇല്ലാത്തവരെ മാത്രമേ ആരാധനാലയത്തില് പ്രവേശിക്കാന് അനുവദിക്കൂ
- പ്രവേശന കവാടത്തില് താപനില പരിശോധിക്കാന് സംവിധാനം ഉണ്ടാകണം
- മാസ്കുകള് ഇല്ലാത്തവരെ പ്രവേശിപ്പിക്കരുത്
- ഒരുമിച്ച് ആള്ക്കാരെ പ്രവേശിപ്പിക്കരുത്
- ആരാധനാലയത്തില് പ്രവേശിക്കുന്നതിന് മുമ്പ് കൈയും കാലും സോപ്പും വെള്ളവും ഉപയോഗിച്ച് കഴുകണം
- പാദരക്ഷകള് കഴിവതും വാഹനങ്ങളില് തന്നെ വെയ്ക്കണം. അതിന് സാധിച്ചില്ലെങ്കില് പ്രത്യേകമായാണ് വെയ്ക്കേണ്ടത്. ഒരു കുടുംബത്തിലെ അംഗങ്ങള്ക്ക് ഒരുമിച്ച് പാദരക്ഷകൾ വെയ്ക്കാം
- ക്യുവില് സാമൂഹിക അകലം ഉറപ്പാക്കണം. ആറടി അകലം ഉണ്ടാകണം
- ആരാധനാലയത്തിന് പുറത്ത് ഉള്ള കടകള്, ഹോട്ടലുകള് എന്നിവിടങ്ങളിലും സാമൂഹിക അകലം ഉറപ്പാക്കണം
- ആരാധനാലയത്തിന് പുറത്തേക്ക് പോകാന് പ്രത്യേക വഴി ഉണ്ടാകണം
- വലിയ ആള്ക്കൂട്ടം ഉണ്ടാകുന്ന ചടങ്ങുകള് അനുവദിക്കരുത്
- പരാമാവധി റെക്കോര്ഡ് ചെയ്ത ആത്മീയ ഗാനങ്ങളും, വാദ്യമേളങ്ങളും ആണ് ഉപയോഗിക്കേണ്ടത്. തത്സമയ ചടങ്ങുകള് അനുവദിക്കരുത്
- ആരാധനാലയം കൃത്യമായ ഇടവേളകളില് കഴുകുകയും, അണുവിമുക്തമാക്കുകയും വേണം
- ആരെങ്കിലും ആരാധനാലയത്തില് വച്ച് അസുഖ ബാധിതര് ആയാല്, അവരെ പെട്ടെന്ന് ഒരു മുറിയിലേക്ക് മാറ്റണം. ഡോക്ടറെ വിളിച്ച് വരുത്തി പരിശോധിപ്പിക്കണം. കൊവിഡ് സ്ഥിരീകരിച്ചാല് ഉടന് ആരാധനാലയം അണുവിമുക്തമാക്കണം
- 65 വയസ്സ് കഴിഞ്ഞവരും, 10 വയസ്സിന് താഴെ ഉള്ളവരും, ഗര്ഭിണികളും, മറ്റ് അസുഖങ്ങള് ഉള്ളവരും വീടുകളില് തന്നെ കഴിയണം. ആരോഗ്യ സംബന്ധമായ അടിയന്തര ആവശ്യങ്ങള് ഇല്ലെങ്കില് അവര് വീടുകളില് നിന്ന് പുറത്തേക്ക് വരരുത്
ഇക്കാര്യങ്ങളെല്ലാം ആരാധനാലയങ്ങളുടെ മാനേജ്മെന്റുകള് ഉറപ്പാക്കണമെന്നും മാര്ഗ്ഗരേഖയില് ആവശ്യപ്പെട്ടിട്ടുണ്ട്.
