മഹാരാഷ്ട്രയില് ഒമിക്രോണ് സ്ഥിരീകരിച്ചയാളുടെ പരിശോധന ഫലം നെഗറ്റീവായി. 33 കാരനായ മറൈന് എഞ്ചിനീയരാണ് രോഗമുക്തി നേടി ആശുപത്രി വിട്ടത്. ഏഴ് ദിവസം ഹോം ക്വാറന്റൈനില് തുടരാന് നിര്ദേശം നല്കിയിട്ടുണ്ട്. വാര്ത്താ ഏജന്സിയായ പിടിഐ ആണ് ഇക്കാര്യം റിപ്പോര്ട്ട് ചെയ്തത്.
കല്യാണ് ടൗണിലെ കൊവിഡ് കെയര് സെന്ററില് പ്രവേശിപ്പിച്ചിരുന്ന അദ്ദേഹത്തെ ബുധനാഴ്ച വൈകിട്ട് 6 മണിയോടെ ഡിസ്ചാര്ജ് ചെയ്തതായി കല്യാണ് ഡോംബിവ്ലി മുനിസിപ്പല് കോര്പ്പറേഷന് (കെഡിഎംസി) കമ്മീഷണര് വിജയ് സൂര്യവന്ഷി പറഞ്ഞു.
”അണുബാധ നെഗറ്റീവ് ആയതിനാല് അദ്ദേഹത്തെ ഡിസ്ചാര്ജ് ചെയ്തു. സ്റ്റാന്ഡേര്ഡ് പ്രോട്ടോക്കോള് അനുസരിച്ച്, അദ്ദേഹത്തിന്റെ രണ്ട് ആര്ടി-പിസിആര് ടെസ്റ്റുകള് നടത്തി, രണ്ടും നെഗറ്റീവ് ആയി. അദ്ദേഹത്തിന് ഇപ്പോള് സുഖമായിരിക്കുന്നു, രോഗലക്ഷണങ്ങളൊന്നുമില്ല,” വിജയ് സൂര്യവന്ഷി പറഞ്ഞു.
നവംബര് അവസാനവാരമാണ് ഇദ്ദേഹം ദക്ഷിണാഫ്രിക്കയില് നിന്ന് ദുബായ് വഴി ഡല്ഹിയില് എത്തിയത്. മുംബൈയ്ക്കടുത്തുള്ള കല്യാണ്- ഡോംബിവ്ലി മുനിസിപ്പല് ഏരിയയില് താമസിക്കുന്ന ഇയാള് വാക്സിന് എടുത്തിരുന്നില്ല. നിലവില് മഹാരാഷ്ട്രയില് 10 ഒമിക്രോണ് കേസുകളാണ് റിപ്പോര്ട്ട് ചെയ്തത്.