ബംഗളൂരു: ലോക്സഭാ തിരഞ്ഞെടുപ്പില്‍ തിരഞ്ഞെടുപ്പ് കമ്മീഷന്‍ ബിജെപിയുമായി ചേര്‍ന്ന് വോട്ടര്‍ പട്ടികയില്‍ കൃത്രിമം കാണിച്ച് ഒത്തുകളിച്ച് ലോക്സഭാ തിരഞ്ഞെടുപ്പ് അട്ടിമറിച്ചെന്ന് ലോക്സഭാ പ്രതിപക്ഷ നേതാവ് രാഹുല്‍ ഗാന്ധി വാര്‍ത്താസമ്മേളനത്തില്‍ ആരോപിച്ചു.
ബാംഗ്ലൂര്‍ സെന്‍ട്രല്‍ ലോക്സഭാ മണ്ഡലത്തിലെ മഹാദേവപുര നിയമസഭാ മണ്ഡലത്തില്‍ വോട്ടര്‍ പട്ടികയില്‍ വന്‍ കൃത്രിമം നടന്നതായി രാഹുല്‍ ആരോപിച്ചു. മഹാദേവപുര നിയമസഭാ മണ്ഡലത്തിലെ 6.5 ലക്ഷം വോട്ടുകളില്‍ ഒരു ലക്ഷത്തിലധികം വോട്ടുകള്‍ കൃത്രിമമാണെന്ന് രാഹുല്‍ ഗാന്ധി പറഞ്ഞു. ഇവിടെ വ്യാജ വോട്ടര്‍മാരെയും, അസാധുവായ വിലാസങ്ങളും, ഒന്നിലധികം വോട്ടുകള്‍ ചെയ്യുന്നവരെയും കോണ്‍ഗ്രസ് നടത്തിയ ആഭ്യന്തര അന്വേഷണത്തില്‍ കണ്ടെത്തിയതായും അദ്ദേഹം പറഞ്ഞു. 11,965 പേര്‍ക്ക് ഒന്നിലധികം വോട്ടുകളും, 40,009 പേര്‍ക്ക് വ്യാജ മേല്‍വിലാസവും 10,452 പേര്‍ക്ക് ഒരേ വിലാസവും, 4132 പേര്‍ക്ക് തെറ്റായ ചിത്രങ്ങളും 33,692 പേര്‍ക്ക് ഫോം 6 ഇല്ലെന്നുംമാണ് കണ്ടെത്തിയത്.
2024-ലെ ലോക്സഭാ തിരഞ്ഞെടുപ്പില്‍ ബാംഗ്ലൂര്‍ സെന്‍ട്രലില്‍ ശക്തമായ മത്സരമാണ് നടന്നത്. വോട്ടെണ്ണലിന്റെ ഭൂരിഭാഗം സമയത്തും കോണ്‍ഗ്രസ് സ്ഥാനാര്‍ത്ഥി മന്‍സൂര്‍ അലി ഖാന്‍ ലീഡ് നിലനിര്‍ത്തിയെങ്കിലും, അന്തിമ ഫലത്തില്‍ ബിജെപിയുടെ പി സി മോഹന്‍ 32,707 വോട്ടുകളുടെ നേരിയ ഭൂരിപക്ഷത്തില്‍ വിജയിക്കുകയായിരുന്നു. വ്യാജ വോട്ടര്‍മാരെ വോട്ടര്‍ പട്ടികയില്‍ ചേര്‍ക്കുന്നുണ്ടെന്ന് വാര്‍ത്താസമ്മേളനത്തില്‍ വോട്ടര്‍ പട്ടിക എടുത്ത് കാട്ടി രാഹുല്‍ വ്യക്തമാക്കി.
