ആലപ്പുഴ: സ്‌കൂളിലെത്താന്‍ അഞ്ചു മിനുട്ട് വൈകിയതിന് കുട്ടികളെ പുറത്താക്കി ഗെയ്റ്റ് അടച്ച് എടത്വ സെന്റ് അലോഷ്യസ് സ്‌കൂള്‍ അധികൃതരുടെ ക്രൂരത. 25 ഓളം വിദ്യാര്‍ത്ഥികളെയാണ് സ്‌കൂളിലേക്ക് കയറ്റാതെ ഗേറ്റ് പൂട്ടിയത്. കുട്ടികള്‍ വെയിലത്ത് റോഡില്‍ നില്‍ക്കുകയാണ്. അതേസമയം സ്ഥിരം വൈകുന്നവരെയാണ് പുറത്ത് നിര്‍ത്തിയതെന്ന് പ്രിന്‍സിപ്പല്‍ മാത്തുക്കുട്ടി വര്‍ഗീസ് പറഞ്ഞു. രാവിലെ ഒമ്പത് മണിക്ക് ആണ് സ്‌കൂളില്‍ ബെല്‍ അടിക്കുന്നത്. 9.10 വരെ എത്തിയ കുട്ടികളെ ക്ലാസിലേക്ക് കയറ്റിയിട്ടുണ്ട്. ക്ലാസില്‍ കയറാതെ കറങ്ങി നടക്കുന്നവരാണ് ഈ കുട്ടികള്‍. അതുകൊണ്ടാണ് സ്‌കൂളില്‍ നിന്നും പുറത്താക്കി ഗേറ്റ് അടച്ചതെന്നും പ്രിന്‍സിപ്പല്‍ പ്രതികരിച്ചു. വിദ്യാര്‍ത്ഥികളെ പുറത്താക്കിയതിനെതിരെ രക്ഷിതാക്കള്‍ രംഗത്തെത്തിയിട്ടുണ്ട്. കുട്ടികള്‍ അഞ്ചുമിനുട്ട് വൈകിയതിനാണ് ഈ ക്രൂരത എന്ന് രക്ഷിതാക്കള്‍ പറഞ്ഞു.
