കാക്കനാട് :പൊതുജനങ്ങളില് ഹരിതചട്ടം പാലിച്ചുള്ള ഓണാഘോഷത്തിന്റെ അവബോധം സൃഷ്ടിക്കുന്നതിന് ജില്ലാ ശുചിത്വ മിഷന്റെ നേതൃത്വത്തില് മാവേലി പര്യടനം ആരംഭിച്ചു. പ്രചാരണ യാത്രയുടെ ഫ്ലാഗ് ഓഫ് ജില്ലാ കളക്ടര് ജി. പ്രിയങ്ക നിര്വഹിച്ചു. ഹരിതചട്ടം പാലിച്ച് പരിപാടികള് നടത്തുന്നതിന് അവബോധം സൃഷ്ടിക്കുക, ഓണക്കാലത്ത് നിരോധിത പ്ലാസ്റ്റിക് ഉല്പന്നങ്ങള്, പേപ്പര് പ്ലേറ്റ്, പേപ്പര് ഗ്ലാസ് തുടങ്ങിയവ ഒഴിവാക്കി പ്രകൃതി സൗഹൃദ ഉല്പ്പന്നങ്ങള് ഉപയോഗിക്കുക എന്നീ ലക്ഷ്യങ്ങളോടെയാണ് പരിപാടി സംഘടിപ്പിക്കുന്നത്.
‘മാവേലി വൃത്തിയുടെ ചക്രവര്ത്തി, ഈ ഓണം ഹരിത ഓണം’ എന്ന സന്ദേശവുമുയര്ത്തികൊണ്ട് ശുചിത്വ മിഷന് സംസ്ഥാന വ്യാപകമായി നടത്തുന്ന ഹരിത ഓണം പ്രചാരണയാത്രയുടെ ഭാഗമായാണ് കാക്കനാട് സിവില് സ്റ്റേഷനില് നിന്ന് പ്രചാരണ വാഹനം പര്യടനം ആരംഭിച്ചത്. ജില്ലയുടെ പ്രധാന കേന്ദ്രങ്ങളില് പ്രചാരണ വാഹനം സന്ദര്ശിക്കുകയും വിവിധ പരിപാടികള് സംഘടിപ്പിക്കുകയും ചെയ്യും. ഫ്ലാഗ് ഓഫ് ചടങ്ങില് ശുചിത്വ മിഷന് ഉദ്യോഗസ്ഥരും പ്രതിനിധികളും പങ്കെടുത്തു.
