അന്തരിച്ച മുതിര്‍ന്ന കോണ്‍ഗ്രസ് നേതാവ് ക്യാപ്റ്റന്‍ സതീഷ് ശര്‍മയുടെ അന്തിമ കര്‍മങ്ങളില്‍ പങ്കാളിയായി കോണ്‍ഗ്രസ് നേതാവ് രാഹുല്‍ ഗാന്ധി. രാജീവ് ഗാന്ധിയുടെ അടുത്ത സുഹൃത്തായിരുന്ന സതീഷ് ശര്‍മയോടുള്ള ആദരസൂചകമായി ചടങ്ങിലുടനീളം അദ്ദേഹം പങ്കെടുത്ത് ശവമഞ്ചം ചുമന്നു.
ഗോവയില്‍ വെച്ചായിരുന്നു അദ്ദേഹത്തിന്റെ അന്ത്യം. 73 വയസ്സായിരുന്നു. ഗാന്ധി കുടുംബവുമായി അടുത്ത ബന്ധമുണ്ടായിരുന്ന അദ്ദേഹം രാഹുല്‍ ഗാന്ധിയുടെ രാഷ്ട്രീയ ഗുരുക്കന്‍മാരില്‍ ഒരാളായിരുന്നു.
ക്യാപ്റ്റന്‍ സതീഷ് ശര്‍മയുടെ മരണത്തില്‍ അതിയായ ദുഃഖമുണ്ടെന്ന് രാഹുല്‍ ട്വിറ്റ് ചെയ്തു. അദ്ദേഹത്തിന്റെ കുടുംബത്തോടും സുഹൃത്തുക്കളോടും സ്‌നേഹവും അനുശോചനം രേഖപ്പെടുത്തിയ രാഹുല്‍ സതീഷ് ശര്‍മയുടെ വേര്‍പാട് എക്കാലവും തീരാനഷ്ടമായിരിക്കുമെന്നും കുറിച്ചു.
മുന്‍ കേന്ദ്രമന്ത്രി കൂടിയായ ക്യാപ്റ്റന്‍ സതീഷ് ശര്‍മയ്ക്ക് ആദരം അര്‍പ്പിച്ച കോണ്‍ഗ്രസ് പാര്‍ട്ടി ജനങ്ങള്‍ക്കായി അദ്ദേഹം നല്‍കിയ സേവനങ്ങള്‍ എക്കാലവും ഓര്‍മിക്കപ്പെടുമെന്നും ട്വീറ്റ് ചെയ്തു. ശര്‍മയുടെ ശവമഞ്ചം ചുമന്ന് നീങ്ങുന്ന രാഹുല്‍ ഗാന്ധിയുടെ ചിത്രങ്ങളും പാര്‍ട്ടി ട്വിറ്ററിലൂടെ പങ്കുവെച്ചു.
പൈലറ്റായിരുന്ന സതീഷ് ശര്‍മ 1993 മുതല്‍ 1996 വരെ നരസിംഹറാവു മന്ത്രിസഭയില്‍ പെട്രോളിയം മന്ത്രിയായിരുന്നു. മൂന്ന് തവണ രാജ്യസഭാംഗവുമായിരുന്നു അദ്ദേഹം.
