കൊല്ലം: കുളത്തൂപ്പുഴ മൈലംമൂട്ടില് പട്ടികജാതി വിഭാഗത്തില്പ്പെട്ട പതിനഞ്ചു വയസുകാരി പ്രസവിച്ചു. മുമ്പ് പോക്സോ കേസില് ഇരയായ പെണ്കുട്ടിയാണ് പ്രസവിച്ചത്. കുളത്തൂപ്പുഴ പൊലീസ് കേസെടുത്ത് അന്വേഷണം ആരംഭിച്ചു.
കുളത്തൂപ്പുഴ മൈലംമൂട്ടിലെ സ്വന്തം വീട്ടിലാണ് പതിനഞ്ചുകാരി പ്രസവിച്ചത്. പ്രസവശേഷം കുഞ്ഞുമായി പെണ്കുട്ടിയുടെ മാതാവ് പുനലൂര് താലൂക്ക് ആശുപത്രിയിലെത്തി. താനാണ് പ്രസവിച്ചത് എന്ന് പറഞ്ഞാണ് ഇവര് ആശുപത്രിയെ സമീപിച്ചത്. എന്നാല് സംശയം തോന്നിയ ആശുപത്രി ജീവനക്കാര് നടത്തിയ പരിശോധനയിലാണ് കാര്യങ്ങള് വ്യക്തമായത്. പിന്നീട് മകളാണ് പ്രസവിച്ചതെന്ന് ഇവര് തന്നെ സമ്മതിച്ചു.
ഈ പെണ്കുട്ടി 2016 ല് പോക്സോ കേസില് ഇരയായിരുന്നു. പെണ്കുഞ്ഞിനാണ് പതിനഞ്ചുകാരി ജന്മം നല്കിയത്. മാതാവിനും കുഞ്ഞിനും മറ്റ് ആരോഗ്യ പ്രശ്നങ്ങള് ഇല്ല. സംഭവത്തില് കുളത്തുപ്പുഴ പൊലീസ് കേസെടുത്ത് അന്വേഷണം ആരംഭിച്ചു. പെണ്കുട്ടിയുടെ മൊഴി രേഖപ്പെടുത്തിയ ശേഷം മാത്രമേ കൂടുതല് വിവരങ്ങള് അറിയാന് കഴിയൂവെന്ന് പൊലീസ് വ്യക്തമാക്കി.