നടിയെ ആക്രമിച്ച കേസില് നടന് ദിലീപിനെ വീണ്ടും ചോദ്യം ചെയ്യും. ദിലീപിന് പുറമേ സഹോദരന് അനൂപ്, സഹോദരി ഭര്ത്താവ് സൂരജ്, പള്സര് സുനി തുടങ്ങിയവരെയും ചോദ്യം ചെയ്യും. ചോദ്യം ചെയ്യലിനുള്ള നോട്ടീസ് നല്കി അടുത്ത ദിവസം തന്നെ എല്ലാവരെയും വിളിച്ചു വരുത്തും. സംവിധായകന് ബാലചന്ദ്ര കുമാറിന്റെ വെളിപ്പെടുത്തലില് ഈ മാസം 20നകം അന്വേഷണ റിപ്പോര്ട്ട് സമര്പ്പിക്കാനാണ് വിചാരണ കോടതിയുടെ നിര്ദ്ദേശം.
കേസില് സംവിധായകന് ബാലചന്ദ്രകുമാറിന്റെ രഹസ്യ മൊഴിയെടുക്കാന് അന്വേഷണ സംഘം കോടതിയെ സമീപിച്ചു. എറണാകുളം സി.ജെ.എം കോടതിയിലാണ് അപേക്ഷ നല്കിയത്. രഹസ്യ മൊഴി രേഖപ്പെടുത്താന് ഏതെങ്കിലും മജിസ്ട്രേറ്റിനെ ചുമതലപ്പെടുത്തണമെന്ന ആവശ്യമാണ് അന്വേഷണ സംഘം ഉയര്ത്തിയിട്ടുള്ളത്.
ബാലചന്ദ്രകുമാറിന്റെ മൊബൈല് ഫോണ്, പെന് ഡ്രൈവിലാക്കി നല്കിയ വിവരങ്ങള് എന്നിവ കഴിഞ്ഞ ദിവസം പ്രോസിക്യൂഷന് കോടതിക്ക് സമര്പ്പിച്ചിരുന്നു. ഈ വിവരങ്ങളുടെ അടിസ്ഥാനത്തില് 164 സ്റ്റേറ്റ്മെന്റ് രേഖപ്പെടുത്തണമെന്ന ആവശ്യമാണ് പ്രോസിക്യൂഷന് കോടതിയില് ഉന്നയിച്ചിട്ടുള്ളത്.
