തെന്നിന്ത്യ കാത്തിരുന്ന ആ താരവിവാഹത്തിന് ഇനി മണിക്കൂറുകള് മാത്രം ബാക്കി. നയന്താരയും വിഗ്നേഷ് ശിവനും ഇന്ന് വിവാഹിതരാവുകയാണ്. വിവാഹത്തിന് മണിക്കൂറുകള് മാത്രം ബാക്കി നില്ക്കെ വിഗ്നേഷ് ശിവന് പ്രതിശ്രുത വധുവായ നയന്താരയ്ക്ക് വേണ്ടിയെഴുതിയ ഇന്സ്റ്റഗ്രാം കുറിപ്പാണ് ഇപ്പോള് സമൂഹ മാധ്യമങ്ങളില് ചര്ച്ചയായിരിക്കുന്നത്.
‘ഇന്ന് ജൂണ് 9…ദൈവത്തിനും, പ്രപഞ്ചത്തിനും, എന്റെ പ്രിയപ്പെട്ട മനുഷ്യര്ക്കും നന്ദി പറയുന്നു. എല്ലാ നല്ല ഹൃദയങ്ങളും, നല്ല നിമിഷങ്ങളും, ചില നല്ല യാദൃശ്ചികതകളും, അനുഗ്രഹങ്ങളും, എന്നുമുള്ള ചിത്രീകരണവും, പ്രാര്ത്ഥനയുമാണ് ജീവിതം അത്രമേല് സുന്ദരമാക്കിയത്. ഇതെല്ലാം എന്റെ പ്രിയപ്പെട്ടവള്ക്ക് ഡെഡിക്കേറ്റ് ചെയ്യുന്നു. എന്റെ തങ്കമേ… നീ മണിക്കൂറുകള്ക്കം തന്നെ മണ്ഡപത്തിലേക്ക് വരുന്നത് കാണാന് അതിയായ ആകാംക്ഷ.
നല്ലത് വരുത്താന് ദൈവത്തോട് പ്രാര്ത്ഥിക്കുന്നു. കുടുംബത്തിനും സുഹൃത്തുക്കളുടേയും സാന്നിധ്യത്തില് ജീവിതത്തിലെ പുതിയൊരു ഏടിന് തുടക്കമിടുന്നു’.
ചെന്നൈയ്ക്ക് സമീപം മഹാബലിപുരത്തുള്ള റിസോര്ട്ടിലാണ് ഹൈന്ദവാചാരപ്രകാരമുള്ള ചടങ്ങുകള്. ഇരുവരുടെയും കുടുംബാംഗങ്ങളും അടുത്തബന്ധുക്കളും സുഹൃത്തുക്കളും മാത്രമാകും പങ്കെടുക്കുക. മാധ്യമങ്ങള്ക്കടക്കം ചടങ്ങ് നടക്കുന്നിടത്തേക്ക് പ്രവേശനമില്ല.
ഉച്ചയോടെ വിവാഹചിത്രങ്ങള് പുറത്തുവിടുമെന്ന് വിഘ്നേഷ് ശിവന് അറിയിച്ചു. ശനിയാഴ്ച ഇരുവരും മാധ്യമങ്ങളെ കാണും. വിവാഹസത്കാരത്തില് തമിഴ്നാട് മുഖ്യമന്ത്രി എം.കെ. സ്റ്റാലിന്, സൂപ്പര് താരങ്ങളായ രജനീകാന്ത്, കമല്ഹാസന് തുടങ്ങിയവര് പങ്കെടുക്കുമെന്നാണ് വിവരം.
സംവിധായകന് ഗൗതം മേനോനാണ് വിവാഹച്ചടങ്ങുകളുടെ സംവിധാനം നിര്വഹിക്കുന്നതെന്നാണ് സൂചന. വിവാഹച്ചടങ്ങിന്റെ സംപ്രേഷണാവകാശം ഒ.ടി.ടി. പ്ലാറ്റ്ഫോമായ നെറ്റ്ഫ്ലിക്സിന് നല്കിയിരിക്കുകയാണെന്നും റിപ്പോര്ട്ടുകളുണ്ട്.