സാമ്പത്തിക പ്രതിസന്ധിക്കിടെ ബി.സി.സി.ഐയുമായുള്ള കരാറില് നിന്ന് ബൈജൂസ് പിന്മാറുന്നു. ജഴ്സി സ്പോണ്സര്ഷിപ്പില് നിന്നാണ് കമ്പനി പിന്മാറ്റത്തിനൊരുങ്ങുന്നത്. ചെലവ് ചുരുക്കലിന്റെ ഭാഗമായാണ് നടപടിയെന്നാണ് അറിയുന്നത്.
ഇക്കാര്യം ബൈജൂസ് ബി.സി.സി.ഐയെ അറിയിച്ചതായി ‘എക്ണോമിക് ടൈംസ്’ റിപ്പോര്ട്ട് ചെയ്തു. 2023 അവസാനം വരെയാണ് ബൈജൂസ് ബി.സി.സി.ഐയുമായി ജഴ്സി സ്പോണ്സര്ഷിപ്പ് കരാറില് ഏര്പ്പെട്ടിട്ടുള്ളത്. എന്നാല്, അടുത്ത വര്ഷം മാര്ച്ചോടെ തന്നെ കരാറില് നിന്ന് പിന്വാങ്ങാനാണ് കമ്പനി ആലോചിക്കുന്നത്.
2021 സാമ്പത്തിക വര്ഷത്തില് ബൈജൂസിന്റെ പരസ്യ, പ്രചാരണ ചെലവ് 150 ശതമാനം കുത്തനെ ഉയര്ന്നിരുന്നു. 899 കോടിയില് നിന്ന് ഒറ്റയടിക്ക് 2,251 കോടിയായാണ് ഇത് ഉയര്ന്നത്. എന്നാല്, വരുമാനത്തില് വെറും നാല് ശതമാനത്തിന്റെ വളര്ച്ചയാണുണ്ടായത്. കഴിഞ്ഞ സാമ്പത്തിക വര്ഷത്തില് 4,588 കോടി രൂപയുടെ നഷ്ടം രേഖപ്പെടുത്തുകയും ചെയ്തു. ഇതിനു പിന്നാലെ തൊഴിലാളികളെ വ്യാപകമായി പിരിച്ചുവിട്ട് സാമ്പത്തിക പ്രതിസന്ധി പരിഹരിക്കാനായിരുന്നു ബൈജൂസിന്റെ നീക്കം.
ബി.സി.സി.ഐയുടെ ജഴ്സി സ്പോണ്സര്ഷിപ്പിനു പുറമെ ഖത്തര് ഫിഫ ലോകകപ്പിന്റെ ഔദ്യോഗിക സ്പോണ്സര്മാരിലും ബൈജൂസുണ്ട്. രാജ്യാന്തര ക്രിക്കറ്റ് കൗണ്സിലിന്റെയും ഔദ്യോഗിക സ്പോണ്സറാണ് ബൈജൂസ്. 330 കോടി രൂപയാണ് ലോകകപ്പ് സ്പോണ്സര്ഷിപ്പ് ഇനത്തില് ബൈജൂസ് ഫിഫയ്ക്ക് നല്കുന്നത്.
