മൂവാറ്റുപുഴ: പ്രൊഫഷണല്‍സിനെയും യുവാക്കളെയും ഉള്‍പ്പെടുത്തി 1000 ല്‍ അധികം പേരടങ്ങുന്ന കോവിഡ് പ്രതിരോധ സേനയക്ക് രൂപം നല്‍കി മാത്യു കുഴല്‍നാടന്‍. കേരളത്തിന് തന്നെ മാതൃകയായാണ് മൂവാറ്റുപുഴയില്‍ നിന്നും പുതിയ സന്നദ്ധ സേനയുടെ പ്രവര്‍ത്തനം. ടെക്നോളജിയും യുവാക്കളും വിദ്യാസമ്പന്നരും പ്രൊഫഷണലിസ്റ്റുകളുടെ എക്സ്പീരിയന്‍സും ഉള്‍പ്പെടുത്തിയുള്ള പുതിയ സേനയാണ് കോവിഡ് പ്രതിരോധത്തിനായി രൂപീകരിച്ചിട്ടുള്ളത്. 24 മണിക്കുറും സേവന സന്നദ്ധമായി ഹെല്‍പ്പ് ലൈന്‍ സംവിധാനവും ഏര്‍പ്പെടുത്തിയിട്ടുണ്ട്.
പ്രളയ കാലത്തെ നേരിടാന്‍ പെണ്‍കുട്ടികള്‍ അടക്കമുള്ള യുവ സമൂഹം മുന്നോട്ട് വന്നതിന്റെ പ്രതീക്ഷയിലാണ് മാത്യു കുഴല്‍നാടന്‍ കോവിഡ് പ്രതിരോധ ബ്രിഗേഡ് രജിസ്ട്രേഷന് തുടക്കം കുറിച്ചത്. കേരളത്തിനും ഇന്ത്യക്കും പുറത്തുള്ളവര്‍ക്കും കോവിഡ് ബ്രിഗേഡിന്റെ ഭാഗമാകാമെന്നതായിരുന്നു ബ്രിഗേഡിന്റെ പ്രത്യേകത. രജിസ്ട്രേഷന് വന്‍ സ്വീകാര്യതയാണ് ലഭിച്ചത്. തുടങ്ങി 3 ദിവസം കൊണ്ട് 1000 ല്‍ അധികം പേര്‍ രജിസ്റ്റര്‍ ചെയ്തു. കഴിഞ്ഞ 6 ദിവസങ്ങഴായി പ്രവര്‍ത്തനങ്ങളില്‍ ഇവരുടെ സജീവ പങ്കാളിത്തമുണ്ട്.
ആയിരം പേരില്‍ 650 പേരും മണ്ഡലത്തിലുളള വരാണ്. മറ്റുള്ളവരില്‍ മൂവാറ്റുപുഴക്ക് പുറത്ത് ജോലി ചെയ്യുന്നവരും സന്നദ്ധ പ്രവര്‍ത്തനത്തിന് താല്‍പര്യമുള്ളവരും ഉള്‍പെടും.
അഞ്ച് വിഭാഗമായി തിരിച്ചാണ് കോവിഡ് പ്രതിരോധ സേന പ്രവര്‍ത്തിക്കുന്നത്. കോവിഡ് രോഗികളെ വിളിച്ച് അവരുടെ ആരോഗ്യസ്ഥിതി ചോദിച്ചറിഞ്ഞ് ആവശ്യമുള്ളവര്‍ക്ക് ടെലിമെഡിക്കല്‍ കണ്‍സള്‍ട്ടിംഗ് സൗകര്യം നല്‍കുകയാണ് ഒന്നാം വിഭാഗത്തിലുള്ളവര്‍ ചെയ്യുക. വിവിധ വിഭാഗത്തിലുള്ള സ്പെഷ്യലൈസ്ട് ആയുള്ള 18 ഡോക്ടര്‍മാരുടെ ടെലി മെഡിക്കല്‍ കണ്‍സള്‍ട്ടിംഗ് ലഭ്യമാണ്. ഇവരില്‍ കോവിസ് മെഡിസിന്‍ ആവശ്യമുള്ളവര്‍ക്ക് സൗജന്യമായി മെഡിസിന്‍ എത്തിച്ച് നല്‍കുകയാണ് രണ്ടാം വിഭാഗത്തിലുള്ളവര്‍ ചെയ്യുക. സാമ്പത്തികമായി ബുദ്ധിമുട്ടനുഭവിക്കുന്നവര്‍ക്ക് ആവശ്യമായ ഭക്ഷ്യധാന്യ കിറ്റുകള്‍ സൗജന്യമായി എത്തിച്ചു നല്‍കുകയാണ് മൂന്നാമത്തെ വിഭാഗത്തില്‍ പ്രവര്‍ത്തിക്കുന്ന സോനംഗങ്ങള്‍ ചെയ്യുക.
കോവിഡ് രോഗികളുള്ള വീട്ടിലെ ആര്‍ക്കെങ്കിലും ആശുപത്രിയിലോ മറ്റ് പോകണമെന്നുണ്ടെങ്കില്‍ അവര്‍ക്കായി സാനിറ്റൈസ് ചെയ്ത വാഹനമോ ആബുലന്‍സ് സൗകര്യമോ നല്‍കുന്നതാണ്. ഇതിനായി നാല് വാഹനങ്ങള്‍ ഒരുക്കിയിട്ടുണ്ട്. ഈ സൗകര്യം ഉപയോഗിക്കുന്നതിനായി ഹെല്‍പ്പലൈന്‍ നമ്പരില്‍ വിളിച്ച് സ്ഥലവും രോഗിയുടെ പേരും പറഞ്ഞാല്‍ സൗകര്യം ഏര്‍പ്പെടുത്തും. ഓരോ യാത്രയ്ക്കു ശേഷവും വാഹനം സാനിറ്റൈസ് ചെയ്ത് അണുവിമുക്തമാക്കും. സുരക്ഷയ്ക്കായി ഡ്രൈവര്‍ പിപിഇ കിറ്റ് ധരിക്കുന്നതടക്കമുള്ള സജ്ജീകരണങ്ങളും ഉണ്ട്.
കോവിഡ് വന്ന് മാറിയ രോഗികളുടെ വീടുകള്‍ സൗജന്യമായി സാനിറ്റൈസ് ചെയ്ത് നല്‍കാനുള്ള സൗകര്യം ഏര്‍പ്പെടുത്തിയിട്ടുണ്ട്. ഇവരില്‍ മാനസികമായി ബുദ്ധിമുട്ടനുഭവിക്കുന്നവര്‍ക്ക് കൗണ്‍സിലിംഗ് സൗകര്യം നല്‍കും. കൂടാതെ പുസ്തക വായനയും മറ്റും താല്‍പര്യമുള്ളവര്‍ക്ക് വീടുകളില്‍ പുസ്തകങ്ങള്‍ എത്തിച്ച് നല്‍കുക തുടങ്ങിയ സേവനങ്ങളും ഉള്‍പ്പെടുന്നതാണ് സന്നദ്ധ സേനയുടെ പ്രവര്‍ത്തനം.
കോവിഡ് ബ്രിഗേഡ് രജിസ്ട്രേഷന് ആവേശകരമായ പ്രതികരണമാണ് ലഭിച്ചത്. ഈ പ്രതിസന്ധിയിലും ഒപ്പം നില്‍ക്കാന്‍ യുവസമൂഹമുണ്ടെങ്കില്‍ ഈ പോരാട്ടത്തില്‍ നാം ജയിക്കുമെന്ന് തന്നെയാണ് പൂര്‍ണ വിശ്വാസമെന്ന് ഡോ. മാത്യു കുഴല്‍നാടന്‍ പറഞ്ഞു.
