പെരുമ്പാവൂര്‍ : സംസ്ഥാന ആരോഗ്യ വകുപ്പില്‍ നിന്ന് മാര്‍ച്ച് 31 ന് വിരമിച്ച ആരോഗ്യ വകുപ്പ് ജീവനക്കാര്‍ക്ക് പരമാവധി 3 മാസത്തേക്ക് അഡ്ഹോക്ക് വ്യവസ്ഥയില്‍ നിയമിക്കുവാന്‍ ആരോഗ്യ വകുപ്പ് ഉത്തരവിട്ടു. ഈ വിഷയം ചൂണ്ടിക്കാട്ടി എല്‍ദോസ് കുന്നപ്പിള്ളി എം.എല്‍.എ മുഖ്യമന്ത്രിക്കും ആരോഗ്യവകുപ്പ് മന്ത്രിക്കും കത്ത് നല്‍കിയിരുന്നു. കൊറോണ വൈറസ് വ്യാപനവുമായി ബന്ധപ്പെട്ട പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ടിരുന്ന ജീവനക്കാരെയാണ് ജൂണ്‍ 30 വരെ നിയമിക്കുന്നത്.
സംസ്ഥാനമൊട്ടാകെ എല്ലാ വിഭാഗത്തിലുമുള്ള ഏതാണ്ട് മൂവായിരത്തോളം ജീവനക്കാര്‍ മാര്‍ച്ച്, ഏപ്രില്‍, മെയ് മാസങ്ങളിലായി വിരമിക്കുകയാണ്.1995 വര്‍ഷക്കാലത്ത് സര്‍വ്വീസില്‍ കയറിയ ജീവനക്കാരില്‍ 60 ശതമാനത്തോളം ആളുകള്‍ 56 വയസ്സ് പൂര്‍ത്തിയാക്കി മാര്‍ച്ച്, ഏപ്രില്‍, മെയ് മാസങ്ങളിലായി വിരമിക്കും. 20 ശതമാനം ജീവനക്കാര്‍ ഡിസംബര്‍ മാസത്തിലും വിരമിക്കും. ബാക്കി വരുന്ന 20 ശതമാനം ജീവനക്കാര്‍ 2025 ല്‍ സര്‍വ്വീസില്‍ നിന്നും വിരമിക്കേണ്ടതായി വരും. കേരളത്തില്‍ കോവിഡ് രോഗവുമായി ബന്ധപ്പെട്ട് പ്രതിരോധ പ്രവര്‍ത്തനങ്ങളില്‍ സ്തുത്യര്‍ഹ സേവനം നടത്തുന്ന ജീവനക്കാര്‍ ആണ് ഇവര്‍. ഈ രോഗത്തിന്റെ വ്യാപനം കേരളത്തില്‍ തടയുന്നതിന് വേണ്ടി നടത്തുന്ന പ്രവൃത്തിയില്‍ നിന്നും പരിശീലനം ലഭിച്ച ജീവനക്കാര്‍ വിരമിക്കുമ്പോള്‍ ഉണ്ടാകുന്ന പ്രത്യാഘാതം വലുതാണെന്ന് എം.എല്‍.എ പറഞ്ഞു.
കോവിഡ് 19 രോഗ ലക്ഷണവുമായി വീടുകളില്‍ 14 ദിവസം മുതല്‍ 28 ദിവസം വരെ നിരീക്ഷണത്തില്‍ കഴിയുന്ന ആളുകളെ ഓരോ ദിവസവും രാവിലെയും വൈകുന്നേരവും ഫോണില്‍ വിളിച്ച് അവരുടെ രോഗ വിവരങ്ങള്‍ ചോദിച്ചറിഞ്ഞ് ജില്ലകളിലുള്ള കണ്‍ട്രോള്‍ റൂമുകളിലേക്ക് അറിയിക്കുന്ന ജൂനിയര്‍ ഹെല്‍ത്ത് ഇന്‍സ്‌പെക്ടര്‍ മുതല്‍ ഹെല്‍ത്ത് സൂപ്പര്‍വൈസര്‍ വരെയുള്ളവരാണ് വിരമിച്ചത്. ഈ സാഹചര്യത്തില്‍ ഇവരുടെ സേവനം 3 മാസത്തേക്ക് അല്ലെങ്കില്‍ കോവിഡ് 19 ഭീതി പൂര്‍ണ്ണമായും വിട്ടു പോകുന്നത് വരെയെങ്കിലും നമ്മുടെ സംസ്ഥാനത്തിന് ആവശ്യമാണ്. ഇങ്ങനെ നീട്ടി കിട്ടുന്ന ജീവനക്കാര്‍ക്ക് ശമ്പളം നല്‍കുന്നത്തിന് ജില്ലകളിലെ ദേശിയ ആരോഗ്യ ദൗത്യം ഫണ്ടില്‍ നിന്നും പ്രോഗ്രാം ഓഫീസര്‍മാര്‍ വഴി നല്‍കാം. ഇങ്ങനെ ധാരാളം ജീവനക്കാര്‍ ഇപ്പോള്‍ ദേശിയ ആരോഗ്യ ദൗത്യം വഴി ജോലി ചെയ്യുന്നുണ്ട്. കേരളത്തില്‍ കോവിഡ് രോഗം പടരുന്നത് തടയുന്നതില്‍ വിശ്രമില്ലാതെ പരിശ്രമം നടത്തുന്ന ആരോഗ്യ വകുപ്പ് ജീവനക്കാരുടെ കൂട്ടവിരമിക്കല്‍ കണക്കിലെടുത്ത് അടിയന്തിരമായി ഇടപെട്ട് വേണ്ട നടപടി സ്വീകരിക്കണമെന്നും മുഖ്യമന്ത്രിക്കും ആരോഗ്യ വകുപ്പ് മന്ത്രിക്കും നല്‍കിയ കത്തില്‍ എം.എല്‍.എ ആവശ്യപ്പെട്ടിരുന്നു.
