ഇരുചക്രവാഹന യാത്രക്കാര്‍ക്കുള്ള ഹെല്‍മറ്റുകള്‍ ബിഐഎസ് (ബ്യൂറോ ഓഫ് ഇന്ത്യന്‍ സ്റ്റാന്‍ഡേഡ്‌സ്) നിബന്ധനകള്‍ പ്രകാരമുള്ളതാവണമെന്ന ഉത്തരവ് പുറപ്പെടുവിച്ച് കേന്ദ്ര സര്‍ക്കാര്‍. 2021 ജൂണ്‍ ഒന്ന് മുതല്‍ നിബന്ധന നിലവില്‍ വരും. നിലവാരം കുറഞ്ഞ ഹെല്‍മറ്റുകളുടെ വില്‍പനയും ഉപയോഗവും തടയുന്നതിനാണ് നടപടി.
നിലവാരമുള്ളതും ഭാരം കുറഞ്ഞതുമായ ഹെല്‍മറ്റുകള്‍ ബിഐഎസ് മുദ്രണത്തോടെ നിര്‍മിച്ചു വില്‍പന നടത്തുന്നത് ഉറപ്പാക്കും. നിലവാരം കുറഞ്ഞ ഹെല്‍മറ്റുകള്‍ വിപണിയില്‍ നിന്ന് പരമാവധി ഒഴിവാക്കാനും നടപടികള്‍ സ്വീകരിക്കും. ഇരുചക്ര വാഹനാപകടങ്ങളില്‍ അപകടത്തില്‍പെടുന്നവര്‍ക്ക് തലയ്ക്ക് ഗുരുതര പരുക്ക് ഏല്‍ക്കുന്നതായി കണ്ടെത്തിയിരുന്നു. തുടര്‍ന്ന് സുപ്രിം കോടതിയുടെ നിര്‍ദ്ദേശ പ്രകാരം 2018ല്‍ ഒരു റോഡ് സുരക്ഷാ കമ്മറ്റി രൂപീകരിച്ചിരുന്നു. ഡോക്ടര്‍മാരും മറ്റ് വിവിധ മേഖകളിലെ വിദഗ്ധരും ഉള്‍പ്പെട്ട ഈ കമ്മറ്റിയുടെ നിര്‍ദ്ദേശപ്രകാരമാണ് പുതിയ തീരുമാനം.
രാജ്യത്തെ കാലാവസ്ഥയ്ക്ക് ഭാരം കുറഞ്ഞ ഹെല്‍മറ്റുകളാണ് വേണ്ടതെന്നായിരുന്നു ഈ കമ്മറ്റിയുടെ കണ്ടെത്തല്‍. ഇത് അംഗീകരിച്ച മന്ത്രാലയം ഇത്തരത്തില്‍ ഒരു നിബന്ധന പുരപ്പെടുവിക്കുകയായിരുന്നു.
