ബഹ്റൈനിൽ തൊഴിലുടമകൾ ജീവനക്കാരുടെ ബാങ്ക് അക്കൗണ്ടിലേക്ക് നേരിട്ട് ശമ്പളം മാറ്റണമെന്ന വ്യവസ്ഥ നടപ്പിലാക്കാനുള്ള മുന്നൊരുക്കങ്ങൾ സജീവമായി. ലേബർ മാർക്കറ്റ് റെഗുലേറ്ററി അതോറിറ്റിക്ക് കീഴിലാണ് ഇതിനായുള്ള പ്രവർത്തനങ്ങൾ നടക്കുന്നത്. തൊഴിലാളികൾക്ക് ശമ്പളം ലഭിക്കുന്നതിലെ കൃത്യത ഉറപ്പ് വരുത്തുവാനും ഈ രംഗത്ത് ചൂഷണമൊഴിവാക്കുവാനും ഇതുവഴി സാധിക്കുമെന്നാണ് അധികൃതരുടെ വിലയിരുത്തൽ. ഡബ്ല്യു.പി.എസ് എന്ന പേരിലുള്ള ശമ്പള നിരീക്ഷണസംവിധാനം നടപ്പിലാകുന്നതോടെ രജിസ്റ്റർ ചെയ്ത എല്ലാ തൊഴിലുടമകളും തൊഴിലാളികൾക്കായുള്ള മാസാന്തം ശമ്പളം ബാങ്ക് അക്കൗണ്ടിലേക്ക് നേരിട്ട് മാറ്റേണ്ടി വരും. 
രാജ്യത്തെ തൊഴിലുടമകൾ തൊഴിലാളികൾക്ക് ശമ്പളം നേരിട്ട് ബാങ്ക് അക്കൗണ്ടിലേക്ക് മാറ്റണമെന്ന വ്യവസ്ഥ നടപ്പിൽ വരുത്താനാണ് ബാങ്കുകളും ധനകാര്യ സ്ഥാപനങ്ങളും മുന്നൊരുക്കങ്ങൾ നടത്തുന്നത്. ഏപ്രിൽ മാസം മുതൽ പുതിയ വ്യവസ്ഥ പ്രാബല്യത്തിൽ വരുമെന്നാണ് സൂചന. കഴിഞ്ഞ വർഷം മുതൽ പരിഗണനയിലുള്ള പദ്ധതി ബാങ്കുകൾക്ക് വേണ്ടത്ര തയ്യാറെടുപ്പുകൾ നടത്താൻ വേണ്ടി നീട്ടിവെക്കുകയായിരുന്നു.
