നഷ്ടമായത് സൗഹാര്‍ദത്തിന്റെ പ്രതീകമായ ജനകീയ ഭരണ കര്‍ത്താവിനെ സ്പീക്കര്‍ പി. ശ്രീരാമകൃഷ്ണന്‍
തിരുവനന്തപുരം: ഇന്ത്യയുടെ 13-ാം മത്തെ രാഷ്ട്രപതി ആയിരുന്ന പ്രണബ് കുമാര്‍ മുഖര്‍ജി യുടെ നിര്യണത്തില്‍ കേരള നിയമസഭാ സ്പീക്കര്‍ പി. ശ്രീരാമകൃഷ്ണന്‍ അഗാധമായ ദുഃഖം രേഖപ്പെടുത്തി. കക്ഷിരാഷ്ട്രീയങ്ങള്‍ക്ക് അതീതമായി, സൗഹാര്‍ദത്തിന്റെ പ്രതീകമായി രാഷ്ട്രപതി ഭവനെ 5 വര്‍ഷം മുന്നോട്ട് കൊണ്ടുപോകാന്‍ അദ്ദേഹത്തിനു സാധിച്ചു. സാധാരണ കുടുംബത്തില്‍ ജനിച്ച ഒരു വ്യക്തിയായ അദ്ദേഹം, ഇന്ത്യയുടെ പരമോത സ്ഥാനം വരെ അലങ്കരിക്കാനായി എന്നതും ഏറെ ശ്രദ്ധേയമാണ്. ഇന്ദിരാഗാന്ധിയുടേയും, നരസിംഹറാവുവിന്റേയും കേന്ദ്ര മന്ത്രിസഭയിലും അംഗമായിരുന്ന അദ്ദേഹം ഒരു ജനകീയ നേതാവ്, ഭരണ കര്‍ത്താവ്, രാഷട്രതന്ത്രജ്ഞന്‍ എന്നീ നിലകളിലും പ്രാവീണ്യം തെളിയിച്ചിരുന്നു. രാഷട്രീയത്തിന്റെ എന്നല്ല ഏതു കാര്യത്തേക്കുറിച്ചും നല്ല അറിവുള്ള വ്യക്തി കൂടിയായിരുന്ന പ്രണബ് കുമാര്‍ മുഖര്‍ജിയുടെ മരണം നമ്മുടെ രാജ്യത്തിന് ഒരു വലിയ നഷ്ടം തന്നെയാണന്ന് സ്പീക്കര്‍ അനുശോചിച്ചു.
ചിന്തയുടയും നയതന്ത്രജ്ഞതയുടെയും ആള്‍രൂപം : രമേശ് ചെന്നിത്തല
തിരുവനന്തപുരം: പ്രണബ് കുമാര്‍ മുഖര്‍ജിയുടെ നിര്യാണത്തില്‍ പ്രതിപക്ഷ നേതാവ് രമേശ് ചെന്നിത്തല അനുശോചിച്ചു. ഇന്ത്യന്‍ നാഷണല്‍ കോണ്‍ഗ്രസ് നേരിട്ട ഏത് വെല്ലുവിളിയും തരണം ചെയ്യാന്‍ കഴിയുന്ന തരത്തിലുളള അതുല്യമായ നേതൃത്വം പാര്‍ട്ടിക്ക് നല്‍കിയ നേതാവായിരുന്നു അദ്ദേഹമെന്ന്്് രമേശ് ചെന്നിത്തല തന്റെ അനുശോചന സന്ദേശത്തില്‍ പറഞ്ഞു. എ ഐ സി സി സമ്മേളനങ്ങല്‍ പ്രമേയങ്ങള്‍ അവതരിപ്പിക്കുന്ന ഘട്ടത്തില്‍ അവ തെയ്യാറാക്കാന്‍ ആദ്യം പറയുന്ന പേര് പ്രണബ് കമാര്‍ മുഖര്‍ജിയുടേതായിരുന്നു. ഏത് കാര്യത്തിനും മറുപടി നല്‍കാന്‍ കഴിയുന്ന ഒരു എന്‍സൈക്ളോപ്പീഡിയ കൂടി ആയിരുന്നു അദ്ദേഹം. ആരെയും അത്ഭുതപ്പടുത്തുന്ന ഓര്‍മ്മ ശക്തിയായിരുന്നു അദ്ദേഹത്തിന്റേത്. ബംഗാള്‍ രാഷ്ട്രീയത്തിലും ഇന്ത്യന്‍ രാഷ്ട്രീയത്തിലും പകരം വയ്കാനില്ലാത്ത സാന്നിധ്യമായിരുന്നു പ്രണബ് ദാ. രാഷ്ട്രം പത്മവിഭൂഷന്‍ നല്‍കി ആദരിച്ച അറിവിന്റെയും , ചിന്തയുടയും നയതന്ത്രജ്ഞതയുടെയും ആള്‍രൂപമായിരുന്ന അദ്ദേഹത്തിന്റെ നിര്യാണം ഇന്ത്യന്‍ നാഷണല്‍ കോണ്‍ഗ്രസിനും ഇന്ത്യക്കും കനത്ത നഷ്ടമാണെന്നും രമേശ് ചെന്നിത്തല കൂട്ടിച്ചേര്‍ത്തു.
നഷ്ടപ്പെട്ടത് ലോകം ശ്രദ്ധിച്ച രാഷ്ട്രതന്ത്രജ്ഞനെ: ജോസ് കെ മാണി എംപി
കോട്ടയം: പ്രണബ് മുഖര്‍ജിയുടെ വിയോഗത്തോടെ രാജ്യത്തിന് നഷ്ടമായത് ലോകം ശ്രദ്ധിച്ച ഏറ്റവും വലിയ രാഷ്ട്രതന്ത്രജ്ഞരില്‍ ഒരാളെയാണെന്ന് കേരള കോണ്‍ഗ്രസ് എം ചെയര്‍മാന്‍ ജോസ് കെ. മാണി എം.പി. കെ.എം. മാണി സാറുമായി ഹൃദയബന്ധം സൂക്ഷിച്ചിരുന്ന നേതാവായിരുന്നു അദ്ദേഹം. നെടുമ്പാശേരി വിമാനത്താവളം മുതല്‍ കൊച്ചിമെട്രോ വരെനീണ്ടുകിടക്കുന്ന കേരളത്തിന്റെ വികസന സ്വപ്നങ്ങള്‍ക്ക് ചിറകുവിരിക്കാന്‍ കഴിഞ്ഞത് പ്രണബ് ദാ എന്ന് നാം സ്‌നേഹത്തോടെ വിളിക്കുന്ന പ്രണബ് മുഖര്‍ജിയുടെ പിന്തുണയുടെ സഹായത്തോടെയാണ്. രാജ്യത്തിന്റെ തെക്കേ അറ്റത്തുള്ള നമ്മുടെ സംസ്ഥാനത്തോട് എന്നും അദ്ദേഹം സ്‌നേഹബന്ധം കാത്തുസൂക്ഷിച്ചിരുന്നതായി ജോസ് കെ. മാണി പറഞ്ഞു. ജനപ്രതിനിധികളായി എത്തുന്ന നവാഗതരെ സംബന്ധിച്ചടത്തോളം അദ്ദേഹം അധ്യാപകനും വഴികാട്ടിയുമായിരുന്നു. ഒരിക്കലും മറക്കാനാവാത്ത ആത്മബന്ധമാണ് അദ്ദേഹവുമായി തനിക്ക് ഉണ്ടായിരുന്നതെന്ന് ജോസ് കെ മാണി അനുശോചന സന്ദേശത്തില്‍ പറഞ്ഞു.
വിടപറഞ്ഞത് രാജ്യതന്ത്രജ്ഞന്‍: കെ.സുരേന്ദ്രന്
കോഴിക്കോട്: അപൂര്‍വ്വം വ്യക്തികള്‍ക്ക് മാത്രം കാണുന്ന രാജ്യതന്ത്രജ്ഞത ഗുണമുള്ള നേതാവായിരുന്നു പ്രണബ് കുമാര്‍ മുഖര്‍ജിയെന്ന് ബിജെപി സംസ്ഥാന അദ്ധ്യക്ഷന്‍ കെ.സുരേന്ദ്രന് അനുശോചിച്ചു. ഭാരതത്തിന്റെ രാഷ്ട്രപതിയായിരുന്ന അദ്ദേഹം അടിയുറച്ച ദേശീയവാദിയായിരുന്നു. എന്നും സ്വന്തം നിലപാട് വ്യക്തമായി പ്രഖ്യാപിക്കാന്‍ ധൈര്യം കാണിച്ച കരുത്തുറ്റ ഭരണാധികാരിയായിരുന്നു മുഖര്‍ജി. പ്രധാനമന്ത്രി ആവേണ്ടതായിരുന്നിട്ടും സ്ഥാനം ലഭിക്കാത്തതു കൊണ്ട് സ്വന്തം വിശ്വാസത്തില്‍ നിന്നും വ്യതിചലിക്കാന്‍ അദ്ദേഹം തയ്യാറായില്ല. നരേന്ദ്ര മോദി പ്രധാനമന്ത്രിയായ ശേഷം രാഷ്ട്രപതി എന്ന നിലയില്‍ കേന്ദ്രസര്‍ക്കാരുമായി നല്ലരീതിയില്‍ സഹകരിച്ച് പ്രവര്‍ത്തിക്കാന്‍ അദ്ദേഹത്തിന് സാധിച്ചുവെന്ന് സുരേന്ദ്രന് പറഞ്ഞു. രാഷ്ട്രപതി സ്ഥാനത്ത് നിന്നും പ്രണബ് മുഖര്‍ജി വിടവാങ്ങിയപ്പോള്‍ നരേന്ദ്ര മോദി അദ്ദേഹത്തിനയച്ച കത്ത് ഏറെ ഹൃദയസ്പര്‍ശിയായിരുന്നു. അതുവരെ ഡല്‍ഹിയിലും ദേശീയ രാഷ്ട്രീയത്തിലും അപരിചിതനായ തന്നോട് പുത്രവാത്സല്യത്തോടെയാണ് പ്രണബ്ദാ പെരുമാറിയതെന്ന് പ്രധാനമന്ത്രി കത്തില്‍ പറഞ്ഞു. അദ്ദേഹത്തിന്റെ മഹത്തായ ജനാധിപത്യബോധവും പാണ്ഡിത്യവും എല്ലാവിഭാഗം ജനങ്ങളുടേയും പ്രീതിയും ആദരവും അദ്ദേഹത്തിന് നേടിക്കൊടുത്തു. നാഗ്പൂര്‍ സന്ദര്‍ശിച്ചിതിലും ഡോക്ടര്‍ജിയെ ഭാരതമാതാവിന്റെ മഹാനായ പുത്രനെന്ന് വിശേഷിപ്പിച്ചതിലും പ്രണബ് കുമാര്‍ മുഖര്‍ജിയുടെ വിശാലമായ ദേശീയ വീക്ഷണം പ്രകടമാണെന്ന് സുരേന്ദ്രന് പറഞ്ഞു.
.
