വനിത മതിലിൽ മൂവാറ്റുപുഴയിൽ നിന്നും  6000 വനിതകളെ പങ്കെടുപ്പിക്കുന്നതിനുള്ള ഒരുക്കങ്ങൾ പൂർത്തിയായി

മൂവാററുപുഴ: നാളെ നടക്കുന്ന വനിത മതിലിൽ മൂവാറ്റുപുഴയിൽ നിന്നും  6000 വനിതകളെ പങ്കെടുപ്പിക്കുന്നതിനുള്ള ഒരുക്കങ്ങൾ പൂർത്തിയായതായി ഏരിയ  സംഘാടക സമതി ചെയർമാനും എസ്.എൻ.ഡി.പി.യൂണിയൻ പ്രസി‌ന്റുമായ  വി.കെ. നാരായണനും, കൺവീനറും കെ.പി.എം.എസ് മണ്ഡലം സെക്രട്ടറിയുമായ കെ.പി.  തങ്കപ്പനും  ,രക്ഷാധികാരിയും സി.പി.എം ഏരിയ സെക്രട്ടറിയുമായ  എം.ആർ. പ്രഭാകരനും    അറിയിച്ചു. വനിത മതിലിന്റെ വിജയത്തിനായി എല്ലാ പഞ്ചായത്തിലും വനിതകൾ പങ്കെടുത്ത  നവോത്ഥാന സദസ്സ്  സംഘടിപ്പിച്ചതിനു പുറമെ  വനിത മതിലിന്റെ പ്രചാരണത്തിനായി   സ്ത്രീകൾ മാത്രം പങ്കെടുത്ത്   11 വനിത കാൽനട ജാഥകളും  നടത്തി.

മൂവാററുപുഴ നഗരത്തിൽ പി.കെ.എസിന്റെ നേതൃത്വത്തിൽ വനിതകളുടെ വിളംബരജാഥയും , യുവതി യുവാക്കൾ പങ്കെടുത്ത ഫ്ലാഷ് മോബും സംഘടിപ്പിച്ചു. എസ്.എൻ.ഡി.പി യൂണിയന്റെ  നാലാംഘട്ട  മെെക്രോഫിനാൻസ്  വിതരണത്തിന്റെ ഉദ്ഘാടനം നിർവ്വഹിച്ചുകൊണ്ട്   ജനറൽ സെക്രട്ടറി വെള്ളാപ്പള്ളി നടേശൻ വനിത മതിലിന്റെ പ്രാധാന്യം എടുത്തു പറഞ്ഞു. എല്ലാ ശ്രീനാരായണിയരായ വനിതകളും വനിത മതിലിൽ  പങ്കെടുക്കണമെന്ന് അദ്ദേഹം നിർദ്ദേശിച്ചിരുന്നു.  ജനുവരി 1ന് ഉച്ചകഴിഞ്ഞ് 3ന് നാഷണൽ ഹെെവേയിൽ മന്നം ജംഗ്ഷൻ മുതൽ ജിയോജിറ്റ് വരെയുള്ള രണ്ട് കിലോമീറ്ററിനുള്ളിലാണ് മൂവാററുപുഴയിൽ നിന്നും പോകുന്ന  വനിതകൾ അണിനിരക്കേണ്ടത്.  3.30ന് ട്രയൽ നടത്തി 4ന് മതിൽ തീർത്ത് പ്രതിജ്ഞയെടുക്കേണ്ടതുള്ളതിനാൽ കൃത്യ സമയത്തുതന്നെ വനിതകൾ എത്തിചേരണം. വനിത മതിൽ ചരിത്ര സംഭവമാക്കുന്നതിനുള്ള അവസാന വട്ട പ്രവർത്തനത്തിനത്തിലാണ് നാടിന്റെ നവോത്ഥാന പാരമ്പര്യം നിലനിൽക്കണമെന്ന് ആഗ്രഹിക്കുന്നവരെല്ലാമെന്ന് സംഘാടക സമതി ഭാരവാഹികൾ അറിയിച്ചു.