വിമാനങ്ങളിലെ യാത്രക്കാരുടെ ഭാഗത്ത് നിന്നും ജീവനക്കാരുടെ ഭാഗത്ത് നിന്നും ഉണ്ടാകുന്ന പല സംഭവങ്ങളുടെയും വീഡിയോകള്‍ സമീപകാലത്ത് സാമൂഹിക മാധ്യമങ്ങളില്‍ വൈറലാവാറുണ്ട്. എന്നാല്‍, ഇപ്പോള്‍ സാമൂഹിക മാധ്യമങ്ങളില്‍ വൈറലായിക്കൊണ്ടിരിക്കുന്ന ഒരു വീഡിയോയില്‍ കാണുന്നത് മോശമായി പെരുമാറുന്ന ഒരു യാത്രക്കാരനോട് അതുപോലെ പരുഷമായി തന്നെ പ്രതികരിക്കുന്ന ഒരു ജീവനക്കാരിയേയാണ്. ഇന്‍ഡിഗോയിലാണ് സംഭവം നടന്നത്.
ഡിസംബര്‍ 16 -ന് ഇസ്താംബുളില്‍ നിന്നും ദില്ലിയിലേക്ക് വരികയായിരുന്നു വിമാനം. വിമാനത്തിലെ ഭക്ഷണത്തെ ചൊല്ലിയായിരുന്നു തര്‍ക്കം. ഓര്‍ഡര്‍ ചെയ്ത ഭക്ഷണം മാത്രമേ തനിക്ക് തരാന്‍ സാധിക്കുകയുള്ളൂ എന്ന് എയര്‍ഹോസ്റ്റസ് യാത്രക്കാരനോട് പറയുന്നത് കേള്‍ക്കാം. ഒപ്പം തന്നെ ഇയാളുടെ പരുഷമായ പെരുമാറ്റം കാരണം താനും മറ്റ് ജീവനക്കാരും അക്ഷരാര്‍ത്ഥത്തില്‍ വിഷമിച്ചു പോയി എന്നും എയര്‍ഹോസ്റ്റസ് പറയുന്നുണ്ട്.
പിന്നാലെ യാത്രക്കാരന്‍, എന്തിനാണ് തന്നോട് ശബ്ദം വയ്ക്കുന്നത് എന്നും എയര്‍ഹോസ്റ്റസിനോട് ചോദിക്കുന്നുണ്ട്. നിങ്ങള്‍ ഞങ്ങളോട് ഒച്ച വച്ചതിനാലാണ് തങ്ങള്‍ക്ക് തിരികെയും ഒച്ച വയ്‌ക്കേണ്ടി വന്നത് എന്നും എയര്‍ഹോസ്റ്റസ് പറയുന്നുണ്ട്. ‘സോ സോറി, ഇത്തരത്തില്‍ ജീവനക്കാരോട് താങ്കള്‍ പെരുമാറരുത് സര്‍’ എന്നും എയര്‍ഹോസ്റ്റസ് പറയുന്നു.
‘നിങ്ങള്‍ ഓര്‍ഡര്‍ ചെയ്ത ഭക്ഷണമേ വിളമ്പാന്‍ പറ്റൂ. നിങ്ങളുടെ ബോര്‍ഡിങ് പാസില്‍ സാന്‍വിച്ചാണ് ഓര്‍ഡര്‍ ചെയ്തതായി കാണുന്നത്’ -എന്ന് എയര്‍ ഹോസ്റ്റസ് പറഞ്ഞു. നിങ്ങള്‍ ഞങ്ങളുടെ വേലക്കാരാണ് എന്നായിരുന്നു ഇതിന് യാത്രക്കാരനെറ മറുപടി. ഇതോടെ കൂടുതല്‍ പ്രകോപിതയായ ജീവനക്കാരി ‘ഞാന്‍ കമ്പനിയിലെ ജോലിക്കാരിയാണ്, നിങ്ങളുടെ വേലക്കാരിയല്ല’ എന്ന് പറഞ്ഞു. കാര്യങ്ങള്‍ കൈവിട്ടുപോകുമെന്ന ഘട്ടം എത്തിയതോടെ സഹജീവനക്കാരി ഈ എയര്‍ഹോസ്റ്റസിനെ വിമാനത്തിന്റെ കാബിനിലേക്ക് കൊണ്ടുപോകുന്നതും ദൃശ്യങ്ങളില്‍ കാണാം.
ഭക്ഷണം ഓര്‍ഡര്‍ ചെയ്തതുമായി ബന്ധപ്പെട്ടാണ് സംഭവമുണ്ടായത് എന്ന് ഇന്‍ഡിഗോയും സ്ഥിരീകരിച്ചിട്ടുണ്ട്. ‘സംഭവത്തെ കുറിച്ച് കൂടുതല്‍ മനസിലാക്കാന്‍ ശ്രമിക്കുകയാണ്, യാത്രക്കാരുടെ കംഫര്‍ട്ടിനാണ് തങ്ങളുടെ ഏറ്റവും വലിയ മുന്‍തൂക്കം’ എന്നും ഇന്‍ഡിഗോ വ്യക്തമാക്കി.
ഏതായാലും നിരവധിപ്പേരാണ് വീഡിയോ കണ്ടത്. അതില്‍ ഭൂരിഭാഗം പേരും എയര്‍ഹോസ്റ്റസിനെ പിന്തുണയ്ക്കുകയാണ് ചെയ്തത്. പല യാത്രക്കാരും എയര്‍ഹോസ്റ്റസുമാരോട് വളരെ മോശമായിട്ടാണ് പെരുമാറാറുള്ളത് എന്നും പലരും പറഞ്ഞു.
