തിരുവനന്തപുരം: സേവന-വേതന വ്യവസ്ഥകള് അംഗീകരിച്ച് നടപ്പിലാക്കാത്തതില് പ്രതിഷേധിച്ച് സാക്ഷരതാ പ്രേരക്മാര് സെക്രട്ടറിയേറ്റിനു മുന്നില് സമരം തുടരുന്നു. സമരം നാല് മാസം പിന്നിടുമ്പോഴും സര്ക്കാര് ശാശ്വത പരിഹാരത്തിന് മുതിരാത്തതില് വ്യാപക പ്രതിഷേധം.
മന്ത്രിമാരുമായി ചര്ച്ച നടത്തിയതിനു പിന്നാലെ ചില ആവശ്യങ്ങള് അംഗീകരിക്കപ്പെട്ടു. എങ്കിലും ഉത്തരവ് രേഖാമൂലം നല്കണമെന്നും കാലാനുസൃതമായുള്ള ശമ്പള വിതരണത്തില് തീരുമാനം ഉണ്ടാകണമെന്നുമാണ് സാക്ഷരത പ്രേരക്മാരുടെ ആവശ്യം.സാക്ഷരതാ പ്രേരക്മാരുടെ തദ്ദേശ വകുപ്പിലേക്കുള്ള പുനര്വിന്യാസ ഉത്തരവിറങ്ങി മാസങ്ങള് പിന്നിട്ടിട്ടും സേവന-വേതന വ്യവസ്ഥകള് അംഗീകരിച്ച് നടപ്പിലാക്കാത്തതില് പ്രതിഷേധിച്ചായിരുന്നു സെക്രട്ടറിയേറ്റിന് മുന്പില് പ്രേരക്മാര് അനിശ്ചിത കാല സത്യാഗ്രഹ സമരം തുടങ്ങിയത്.
ആവശ്യങ്ങളിങ്ങനെ
തദ്ദേശവകുപ്പിലേക്കുള്ള പ്രേരക് പുനര്വിന്യാസ ഉത്തരവ് നടപ്പിലാക്കുക, പ്രേരക്മാര്ക്കുള്ള വേതനം തദ്ദേശ സ്ഥാപനങ്ങള് വഴി ലഭ്യമാക്കുക, സാക്ഷരതാ മിഷന് നിര്ത്തലാക്കിയ പ്രേരക്മാരുടെ ഇന്ഷുറന്സ് സ്കീം പുനഃസ്ഥാപിക്കുക തുടങ്ങി ആറോളം ആവശ്യങ്ങള് ഉയര്ത്തിയായിരുന്നു പ്രതിഷേധം.
എന്നാല് മന്ത്രിമാരുടെ നേതൃത്വത്തില് മന്ത്രിമാരുമായി ചര്ച്ച നടന്നു. ചര്ച്ചയ്ക്ക് പിന്നാലെ ആവശ്യപ്പെട്ട പല കാര്യങ്ങള്ക്കും അംഗീകാരം ലഭിക്കുകയും ചെയ്തു. എന്നാല് കാലോചിതമായ വര്ധനവോടെ വേതനം ലഭ്യമാക്കണമെന്ന ആവശ്യത്തില് ഇതുവരെ തീരുമാനം ഉണ്ടായിട്ടില്ല. ശമ്പളം സംബന്ധിച്ച വിഷയത്തില് സര്ക്കാരിന്റെ ഭാഗത്ത് നിന്ന് അനുകൂല നിലപാട് ഉണ്ടാകുമെന്നാണ് പ്രതീക്ഷയെന്ന് സമരക്കാര് പറഞ്ഞു. അതേസമയം മന്ത്രിമാര് നല്കിയ വാഗ്ദാനം രേഖയായി നല്കിയാല് മാത്രമേ സമരം അവസാനിപ്പിക്കുകയുള്ളുവെന്നും പ്രേരക്മാര് അറിയിച്ചു.
