മലപ്പുറം: കുഞ്ഞാലികുട്ടി അടക്കമുള്ള മുതിര്‍ന്ന നേതാക്കളെ വിമര്‍ശിച്ച് യൂത്ത് ലീഗ് ദേശീയ വൈസ് പ്രസിഡന്റ് മുഈനലി തങ്ങള്‍. പ്രായമാവുന്നതിന് അനുസരിച്ച് കാഴ്ച്ചയ്ക്ക് മങ്ങല്‍ വരും, നേതാക്കള്‍ താഴ്ന്നു കൊടുക്കേണ്ട ഇടങ്ങളില്‍ താഴ്ന്നു കൊടുക്കാനുള്ള മനസ് കാണിക്കണം. സ്ഥാന മാനങ്ങളില്‍ പിടിച്ചു തൂങ്ങി നില്‍ക്കേണ്ട കാര്യമില്ലെന്നും മുഈനലി തങ്ങള്‍ പറഞ്ഞു.
പാണക്കാട് കുടുംബത്തിന്റെ കൊമ്പും ചില്ലയും വെട്ടാന്‍ ആരെയും അനുവദിക്കില്ലെന്ന മുസ്ലീം ലീഗ് നേതാവ് പി കെ കുഞ്ഞാലിക്കുട്ടിയുടെ പരാമര്‍ത്തിലായിരുന്നു തങ്ങളുടെ മറുപടി. ആരുമിവിടെ കൊമ്പുവെട്ടാനും ചില്ല വെട്ടാനും പോകുന്നില്ല. അതൊക്കെ ചിലരുടെ വെറും തോന്നലാണ്. . അതൊക്കെ ചികിത്സിച്ചാല്‍ മാറുമെന്നും അദ്ദേഹം കൂട്ടിച്ചേര്‍ത്തു.
ചന്ദ്രനെയും സൂര്യനെയും മറച്ചു പിടിക്കാന്‍ ആരും ശ്രമിക്കുന്നില്ലെന്നും മു ഈനലി തങ്ങള്‍ പറഞ്ഞു. ചന്ദ്രനോളം ഉയരത്തിലുള്ള പാണക്കാട് കുടുംബത്തെ ആര്‍ക്കും സ്പര്‍ശിക്കാനാവില്ലെന്ന സമദാനിയുടെ പരാമര്‍ശത്തിലായിരുന്നു മറുപടി. സമസ്തയുടെ പരിപാടിയിലാണ് ഇരുവര്‍ക്കുമെതിരെ മുഈനലി തങ്ങളുടെ പരാമര്‍ശം.
പാണക്കാടിന്റെ പൈതൃകം എന്ന പേരില്‍ എംഎസ്എഫ് നടത്തിയ ക്യാംപെയിന്റെ സമാപന സമ്മേളനത്തിലായിരുന്നു പാണക്കാട് കുടുംബത്തെക്കുറിച്ചുള്ള കുഞ്ഞാലിക്കുട്ടിയുടെയും സമദാനിയുടെയും പരാമര്‍ശം.
