നൈനിറ്റാള്‍: പ്രധാനമന്ത്രി നരേന്ദ്രമോദി ഒരു ദുരന്തമാണെന്ന് പ്രിയങ്ക ഗാന്ധി. പത്തു വര്‍ഷമായി മോദി സര്‍ക്കാര്‍ ഒന്നും ചെയ്തില്ല, ജനങ്ങള്‍ക്ക് വേണ്ടി പ്രവര്‍ത്തിക്കാന്‍ കഴിയാത്തവര്‍ക്ക് എന്തിനാണ് അധികാരമെന്നും പ്രീയങ്ക ചോദിച്ചു. ഉത്തരാഖണ്ഡിലെ നൈനിറ്റാളിലെ രാംനഗറില്‍ പൊതു റാലിയെ അഭിസംബോധന ചെയ്ത് സംസാരിക്കുകയായിരുന്നു പ്രിയങ്ക. ‘കഴിഞ്ഞ പത്തു വര്‍ഷമായി കോണ്‍ഗ്രസ് അധികാരത്തിലില്ല. ഇപ്പോള്‍ ബിജെപി പറയുന്നു 400 സീറ്റുകള്‍ വേണമെന്ന്.
75 വര്‍ഷമായി രാജ്യത്തൊന്നും ചെയ്തിട്ടില്ലെന്ന് ബിജെപി പറയുന്നു. അങ്ങനെയെങ്കില്‍ ഐഐടികളും ഐഐഎമ്മുകളും എയിംസുകളും രാജ്യത്ത് എങ്ങനെ വന്നു?’, അവര്‍ ചോദിച്ചു. ചന്ദ്രയാന്‍ ചന്ദ്രനില്‍ ഇറങ്ങി. പണ്ഡിറ്റ് ജവഹര്‍ലാല്‍ നെഹ്റു ഇവ നിര്‍മ്മിച്ചില്ലായിരുന്നുവെങ്കില്‍, ഇതൊക്കെ സാധ്യമാണോ എന്നും പ്രിയങ്കാ ഗാന്ധി ചോദിച്ചു. നെഹ്റുവിന്റെ പ്രവര്‍ത്തനങ്ങളെ പ്രശംസിച്ച പ്രിയങ്ക, അദ്ദേഹത്തിന്റെ മുന്‍കൈയില്ലാതെ ഐഐടി, ഐഐഎം, എയിംസ് തുടങ്ങിയ അഭിമാനകരമായ സ്ഥാപനങ്ങള്‍ നിര്‍മ്മിക്കാന്‍ കഴിയുമായിരുന്നില്ലെന്നും പറഞ്ഞു. കേന്ദ്രം ഭരിക്കുന്ന ബിജെപി സര്‍ക്കാര്‍ കേന്ദ്ര ഏജന്‍സികളെ ദുരുപയോഗം ചെയ്യുകയാണെന്നും അവര്‍ ആരോപിച്ചു.
ഹിന്ദുമത വിശ്വാസത്തിന്റെ ഏറ്റവും വലിയ തെളിവ് ‘ത്യാഗം’ ആണ്. തനിക്ക് 19 വയസ്സുള്ളപ്പോള്‍ അച്ഛന്റെ ഛിന്നഭിന്നമായ ശരീരം തന്റെ അമ്മയുടെ മുന്നില്‍ വെച്ചു. രക്തസാക്ഷിത്വവും ത്യാഗവും ഞാന്‍ മനസ്സിലാക്കുന്നു. അവര്‍ തന്റെ കുടുംബത്തെ എത്ര അധിക്ഷേപിച്ചാലും രക്തസാക്ഷിയായ തന്റെ പിതാവിനെ അപമാനിച്ചാലും തങ്ങള്‍ നിശബ്ദത പാലിക്കുമെന്നും അവര്‍ വ്യക്തമാക്കി.
