ഭരണഘടനയാണ് രാജ്യത്തിന്റെ കരുത്തെന്ന് പ്രധാനമന്ത്രി നരേന്ദ്ര മോദി. ലോക ജനാധിപത്യത്തിന്റെ തന്നെ മാതാവാണ് ഇന്ത്യന്‍ ഭരണഘടനയെന്നും മോദി പറഞ്ഞു. സുപ്രീംകോടതിയിലെ ഭരണഘടനാ ദിനാഘോഷത്തില്‍ സംസാരിക്കുകയായിരുന്നു പ്രധാനമന്ത്രി. പാര്‍ശ്വവല്‍കരിക്കപ്പെട്ട ജനവിഭാഗങ്ങള്‍ക്ക് നീതി ലഭിക്കുന്നുണ്ടെന്ന് ഉറപ്പാക്കണമെന്ന് സുപ്രീംകോടതി ചീഫ് ജസ്റ്റിസ് ഡി.വൈ ചന്ദ്രചൂഡ് ആവശ്യപ്പെട്ടു .
മുംബൈ ഭീകരാക്രമണ വാര്‍ഷിക ദിനത്തില്‍ ജീവന്‍ നഷ്ടമായവര്‍ക്ക് ആദരാഞ്ജലികള്‍ അര്‍പ്പിച്ച് കൊണ്ടാണ് പ്രധാന മന്ത്രി ഭരണഘടനാ ദിനാഘോഷത്തില്‍ സംസാരിച്ച് തുടങ്ങിയത്. സ്വാതന്ത്ര്യം ലഭിച്ചാല്‍ അത് കാത്തു സൂക്ഷിക്കാന്‍ ഇന്ത്യക്ക് കഴിയുമോ എന്ന് കരുതിയിരുന്ന ലോകം ഇന്ന് ഇന്ത്യയുടെ വളര്‍ച്ചയെ പ്രതീക്ഷയോടെ നിരീക്ഷിക്കുകയാണെന്ന് പ്രധാനമന്ത്രി പറഞ്ഞു. നമ്മുടെ ഭരണഘടനയാണ് നമ്മുടെ കരുത്തെന്നും മോദി ഓര്‍മിപ്പിച്ചു.
ഇന്ത്യന്‍ ഭരണഘടനയുടെ ചരിത്രം കേവലം നിയമ വ്യവഹാരങ്ങളുടെത് മാത്രമല്ലെന്നും മനുഷ്യന്‍ നേരിട്ട പ്രതിസന്ധികളുടെയും ത്യാഗത്തിന്റെയും ചരിത്രം കൂടിയാണ് എന്നും സുപ്രീംകോടതി ചീഫ് ജസ്റ്റിസ് ഡി.വൈ ചന്ദ്രചൂഡ് പറഞ്ഞു.
കേന്ദ്ര നിയമ മന്ത്രി കിരണ്‍ റിജ്ജു, സുപ്രീംകോടതിയിലെ ന്യായാധിപന്മാര്‍, രാജ്യത്തെ വിവിധ ഹൈക്കോടതികളിലെ ചീഫ് ജസ്റ്റിസുമാര്‍ എന്നിവരും സുപ്രീംകോടതിയില്‍ നടന്ന ഭരണഘടനാ ദിനാഘോഷത്തില്‍ പങ്കെടുത്തു.
