തിരുവനന്തപുരം: ശബരിമല സ്വര്ണക്കൊള്ള കേസില് അറസ്റ്റിലായി പൂജപ്പുര ജില്ലാ ജയിലില് റിമാന്ഡില് കഴിയുകയായിരുന്ന തിരുവിതാംകൂര് ദേവസ്വം ബോര്ഡ് മുന് പ്രസിഡന്റ് പി.എസ്. പ്രശാന്തിനെ തിരുവനന്തപുരം മെഡിക്കല് കോളേജ് ആശുപത്രിയില് പ്രവേശിപ്പിച്ചു. ജയിലില് വച്ച് പനി ബാധിച്ചതിനെ തുടര്ന്ന് നടത്തിയ പരിശോധനയില് തലച്ചോറില് രക്തസ്രാവം കണ്ടെത്തിയതോടെയാണ് അദ്ദേഹത്തെ മെഡിക്കല് കോളേജിലെ ജെറിയാട്രിക് വാര്ഡിലേക്ക് മാറ്റിയത്. ഹൈക്കോടതി അനുമതിയില്ലാതെ ശബരിമലയിലെ ദ്വാരപാലക പാളികള് സ്വര്ണം പൂശാനെന്ന വ്യാജേന പുറത്തേക്ക് കൊണ്ടുപോയ സംഭവത്തിലാണ് പ്രത്യേക അന്വേഷണ സംഘം (എസ്.ഐ.ടി) പ്രശാന്തിനെ അറസ്റ്റ് ചെയ്തത്. 2019-ല് നടന്ന സ്വര്ണക്കൊള്ള മറച്ചുവെക്കാനാണ് സ്മാര്ട്ട് ക്രിയേഷന്സ് എന്ന സ്ഥാപനത്തിന് ദ്വാരപാലക പാളികള് കൈമാറാന് അനുമതി നല്കിയതെന്നാണ് അന്വേഷണ സംഘത്തിന്റെ കണ്ടെത്തല്. നിലവില് വിദഗ്ധ ഡോക്ടര്മാരുടെ മേല്നോട്ടത്തില് അദ്ദേഹത്തിന് ചികിത്സ തുടര്ന്നു വരികയാണ്.
