തൃശൂര്: പ്രശസ്ത പത്രപ്രവര്ത്തകനും എക്സ്പ്രസ് മുന് പത്രാധിപരുമായിരുന്ന ടി.വി അച്യുതവാര്യരുടെ സ്മരണാര്ത്ഥം തൃശൂര് പ്രസ് ക്ലബ് ഏര്പ്പെടുത്തിയ അച്യുതവാര്യര് സ്മാരക പുരസ്കാരങ്ങള് പ്രഖ്യാപിച്ചു. പത്രങ്ങളിലെ മികച്ച മുഖപ്രസംഗമായി മാതൃഭൂമിയില് 2021 ഡിസംബര് 2ന് പ്രസിദ്ധീകരിച്ച കെ.വി. കല എഴുതിയ ‘സമൂഹ അടുക്കളകള് വ്യാപകമാവട്ടെ’ എന്ന മുഖപ്രസംഗം തിരഞ്ഞെടുക്കപ്പെട്ടു. കോഴിക്കോട് പേരാമ്പ്ര പാലേരി സ്വദേശിയായ കെ.വി. കല, ഇപ്പോള് മാതൃഭൂമി ബാലുശേരി ബ്യൂറോയില് റിപ്പോര്ട്ടര് ആണ്.
ചാനലുകളിലെ മികച്ച വാര്ത്താധിഷ്ഠിത പരിപാടിയായി ഏഷ്യാനെറ്റ് ന്യൂസിലെ കെ. അരുണ് കുമാര് തയാറാക്കിയ ‘ആനത്തോഴര്’ തിരഞ്ഞെടുക്കപ്പെട്ടു. മനുഷ്യനും മൃഗങ്ങളും തമ്മിലുള്ള ബന്ധത്തിന്റെ പുതുപാഠങ്ങള് തേടുന്ന ഒന്നായി ഈ പ്രോഗ്രാമിനെ ജൂറി വിലയിരുത്തി. തിരുവനന്തപുരം അയിരൂപ്പാറ സ്വദേശിയായ കെ.അരുണ് കുമാര് തിരുവനന്തപുരം ബ്യൂറോയില് ചീഫ് റിപ്പോര്ട്ടര് ആണ്.
2021 ജൂലൈ 1നും 2022 ജൂണ് 30നും ഇടയ്ക്ക് പ്രസിദ്ധീകരിച്ച മുഖപ്രസംഗങ്ങളും സംപ്രേഷണം ചെയ്ത വാര്ത്താധിഷ്ഠിത പരിപാടികളുമാണ് ഇക്കുറി അവാര്ഡിനായി പരിഗണിച്ചത്. 10,001 രൂപയും പ്രശസ്തിപത്രവും ഫലകവും അടങ്ങുന്നതാണ് ഇരു പുരസ്കാരങ്ങളും.
കാവുമ്പായി ബാലകൃഷ്ണന്, രേണു രാമനാഥ്, ബാബു വെളപ്പായ എന്നിവരടങ്ങുന്ന കമ്മിറ്റിയാണ് പുരസ്കാര നിര്ണയം നടത്തിയത്. ഈ മാസം 28ന് പ്രസ് ക്ലബ് ഹാളില് നടക്കുന്ന ചടങ്ങില് നിയമസഭാ സ്പീക്കര് എം. ബി. രേജേഷ് പുരസ്കാര സമര്പ്പണം നടത്തും.