ന്യൂഡല്‍ഹി: ഇറാന്‍ സൈന്യം പിടിച്ചെടുത്ത കപ്പലില്‍ കുടുങ്ങിയ നാല് മലയാളികളില്‍ ഒരാളായ പാലക്കാട് കേരളശ്ശേരി സ്വദേശി സുമേഷ് വീട്ടുകാരെ ബന്ധപ്പെട്ടു. ആശങ്കപ്പെടേണ്ടതില്ലെന്നും സുരക്ഷിതരാണെന്നും സുമേഷ് അച്ഛനെ അറിയിച്ചു. നേരത്തെ ഈ നാല് മലയാളികളുടെയും സുരക്ഷയുടെ കാര്യത്തില്‍ ആശങ്ക പടര്‍ന്നിരുന്നു. ചരക്കുകപ്പലില്‍ നാലു മലയാളികള്‍ ഉള്‍പ്പെടെ 17 ഇന്ത്യക്കാരാണ് ഉള്‍പ്പെട്ടിട്ടുള്ളത്. സുമേഷ് പിവി, ധനേഷ്, ശിംനാഥ് തുടങ്ങിയ മലയാളികളാണ് കപ്പലിലുള്ളതെന്നായിരുന്നു ആദ്യ റിപ്പോര്‍ട്ട്. എന്നാല്‍ ഇവരെ കൂടാതെ തൃശൂര്‍ വെളുത്തൂര്‍ സ്വദേശിനി ആന്‍ ടസാ ജോസഫും (21) കപ്പലില്‍ കുടുങ്ങിയിട്ടുണ്ടെന്ന വാര്‍ത്ത ഇന്നലെ പുറത്ത് വന്നു.
ശേഷം മകളുടെ ജീവനില്‍ ആശങ്കയുണ്ടെന്നും വെള്ളിയാഴ്ച്ച രാത്രിക്ക് ശേഷം തന്നെ ബന്ധപ്പെട്ടില്ലെന്നും അടിയന്തിര നടപടിയെടുക്കണമെന്നും ആന്‍ ടസയുടെ പിതാവ് ബിജു എബ്രഹാം മാധ്യമങ്ങളോട് പറഞ്ഞിരുന്നു. എന്നാല്‍ ആന്‍ ടസ ഉള്‍പ്പടെ കപ്പലിലുള്ള മുഴുവന്‍ ഇന്ത്യക്കാരും സുരക്ഷിതരാണെന്ന സന്ദേശമാണ് സുമേഷ് ഇന്നലെ രാത്രി പങ്ക് വെച്ചത്. അതിനിടയില്‍ കപ്പലില്‍ കുടുങ്ങിയ ഇന്ത്യക്കാരെ നാട്ടിലെത്തിക്കാനുള്ള ശ്രമങ്ങള്‍ ഊര്‍ജിതമായി തുടരുന്നു. കേന്ദ്രസര്‍ക്കാര്‍ നേരത്തെ തന്നെ നയതന്ത്ര ഇടപെടലുകള്‍ ആരംഭിച്ചിരുന്നു. കേന്ദ്ര വിദേശകാര്യമന്ത്രി ജയശങ്കര്‍ ഇറാന്‍ വിദേശകാര്യ മന്ത്രി അമിറാബ്ദുള്ളാഹിയാനെ ഫോണില്‍ വിളിച്ച് സംസാരിക്കുകയും മോചന കാര്യത്തില്‍ ഉറപ്പ് ലഭിക്കുകയും ചെയ്തിരുന്നു. കേരള മുഖ്യമന്ത്രി പിണറായി വിജയന്‍ നേരത്തെ കേന്ദ്ര വിദേശകാര്യമന്ത്രിക്ക് കത്തയച്ചിരുന്നു. ഉടന്‍ തന്നെ നാല് മലയാളികളടക്കമുള്ള 17 ഇന്ത്യക്കാരെയും മോചിപ്പിച്ച് നാട്ടിലെത്തിക്കാനാവുമെന്നാണ് പ്രതീക്ഷ. നേരത്തെ ഇന്ത്യന്‍ എംബസി ഉദ്യോഗസ്ഥര്‍ക്ക് കപ്പലിലെ ഇന്ത്യന്‍ ജീവനാക്കാരെ കാണാന്‍ അനുവാദം നല്‍കിയിരുന്നു.
