വയനാട്: പൂക്കോട് വെറ്ററിനറി കോളേജ് വിദ്യാര്ഥി സിദ്ധാര്ഥന്റെ മരണത്തില് സി.ബി.ഐ സംഘം വയനാട്ടിലെത്തി. സി.ബി.ഐ അന്വേഷണത്തിനായി കേന്ദ്രസര്ക്കാര് വിജ്ഞാപനമിറങ്ങിയതിന് പിന്നാലെയാണ് സി.ബി.ഐ എസ്പി ഉള്പ്പെടെയുള്ള നാലംഗ സംഘം വയനാട്ടിലെത്തിയത്. ഇവര് ജില്ലാ പോലീസ് മേധാവിയും അന്വേഷണ ഉദ്യാഗസ്ഥനായിരുന്ന കല്പ്പറ്റ ഡി.വൈ.എസ്.പിയുമായും കൂടിക്കാഴ്ച നടത്തി. കേസുമായി ബന്ധപ്പെട്ട പ്രാഥമിക വിവരശേഖരമാണ് നടത്തിയത്. ഫയലുകള് പരിശോധിക്കുകയും മറ്റു വിവരങ്ങള് തേടുകയുമാണ് അനേഷണസംഘം ചെയ്തതെന്നാണ് സൂചന. അന്വേഷണസംഘത്തില് കൂടുതല് പേരെ ഉള്പ്പെടുത്തും.
കേന്ദ്രസര്ക്കാര് ഉടന് അന്വേഷണത്തിന് ഉത്തരവിടണമെന്ന ഹൈക്കോടതി ഉത്തരവിന് പിന്നാലെയാണ് സി.ബി.ഐ. അന്വേഷണത്തിന് വിജ്ഞാപനമിറങ്ങിയത്. അന്വേഷണം വൈകുന്ന ഒരോ നിമിഷവും കുറ്റവാളികള്ക്ക് നേട്ടമാകുമെന്ന് അഭിപ്രായപ്പെട്ട ജസ്റ്റിസ് ബെച്ചു കുര്യന് തോമസ്, ഹര്ജി വീണ്ടും പരിഗണിക്കുന്ന ഏപ്രില് ഒന്പതിനുമുന്പ് വിജ്ഞാപനമിറക്കണമെന്നാണ് നിര്ദേശിച്ചിരുന്നത്. മകന്റെ മരണത്തെക്കുറിച്ചുള്ള അന്വേഷണം അടിയന്തരമായി സി.ബി.ഐ. ഏറ്റെടുക്കണമെന്നാവശ്യപ്പെട്ട് അച്ഛന് ടി. ജയപ്രകാശ് നല്കിയ ഹര്ജിയിലായിരുന്നു കോടതി ഉത്തരവ്.