തിരുവനന്തപുരം: സംസ്ഥാനത്ത് വന്ദേ ഭാരതിന്റെ സര്‍വീസ് അടുത്ത മാസം മുതല്‍. ഇതിനായുള്ള അറ്റകുറ്റ സൗകര്യങ്ങള്‍ കൊച്ചുവേളിയില്‍ പൂര്‍ത്തിയായി. തിരുവനന്തപുരം മുതല്‍ കണ്ണൂര്‍ വരെയാണ് വന്ദേ ഭാരതിന്റെ സര്‍വീസ്. മെയ് മാസം പകുതിയോടെ പരീക്ഷണം നടത്തുവാനാണ് റെയില്‍വേയുടെ തീരുമാനം.
എറണാകുളം മുതല്‍ തിരുവനന്തപുരം വരെ മണിക്കൂറില്‍ 75, 90, 100 കിലോമീറ്റര്‍ എന്നിങ്ങനെയാണ് വേഗത. നഗരങ്ങളിലെ പ്രധാന കേന്ദ്രങ്ങളിലായിരിക്കും സ്റ്റോപ്പുകള്‍. വന്ദേ ഭാരതിനായി രണ്ട് പിറ്റ് ലൈനുകള്‍ വൈദ്യുദീകരിച്ചിട്ടുണ്ട്. ഇരട്ടപ്പാതയുള്ളതിനാല്‍ കോട്ടയം വഴിയാകും സര്‍വീസ്. യാത്രക്കാരുടെ വര്‍ധനവ് അനുസരിച്ച് കോച്ചുകളുടെ എണ്ണം കൂട്ടും.
വിവിധ ഘടകങ്ങള്‍ പരിഗണിച്ചാണ് കേരളത്തില്‍ വന്ദേ ഭാരത് ട്രെയിനുകള്‍ അനുവദിക്കുന്നത്. വിവിധ റൂട്ടുകളില്‍ വന്ദേ ഭാരത് ട്രെയിന്‍ സര്‍വീസ് തുടങ്ങുന്നതിനുള്ള പ്രക്രിയകള്‍ തുടരുകയാണ്.
