കണ്ണൂര്: ഉത്തരമലബാറിന്റെ ചിരകാലസ്വപ്നങ്ങള്ക്ക് ഇന്ന് ചിറകുമുളക്കും. കണ്ണൂര് അന്താരാഷ്ട്ര വിമാനത്താവളം യാഥാര്ത്ഥ്യമാകുബോള് കണ്ണൂരിലെങ്ങും ഉത്സവാന്തരീക്ഷമാണ്. പതിനഞ്ചോളം വിമാനങ്ങളാണ് ഉദ്ഘാടന ദിനത്തില് എയര്പോര്ട്ടിലെത്തുന്നത്. ഞായറാഴ്ച 9.55 ന് അബുദാബിയിലേക്ക് ആദ്യവിമാനം പറക്കും. ഉദ്ഘാടന വേദിയില് 7.30 മുതല് വിവിധ കലാപരിപാടികള് അരങ്ങേറും.
തിരുവാതിരക്കളി, കളരിപ്പയറ്റ്, വനിതാ കോല്ക്കളി, മോഹനിയാട്ടം, ജുഗല്ബന്ദി, നാവികസേനയുടെ ബാന്ഡ് മേളം തുടങ്ങിയവ ഉണ്ടാകും. മട്ടന്നൂര് ശങ്കരന്കുട്ടിയുടെ കേളികൊട്ടോടു കൂടി വിമാനത്താവളം ഉദ്ഘാടച്ചടങ്ങിന് തുടക്കമാവും. 10 മണിക്കാണ് ഉദ്ഘാടന സമ്മേളനം ആരംഭിക്കുക. രാവിലെ 9.30ന് മുഖ്യമന്ത്രി പിണറായി വിജയനും കേന്ദ്ര വ്യോമയാന മന്ത്രി സുരേഷ് പ്രഭുവും ചേര്ന്ന് നിലവിളക്ക് കൊളുത്തി ടെര്മിനല് കെട്ടിടത്തിന്റെ ഉദ്ഘാടനം നിര്വഹിക്കും. 9.55ന് അബുദാബിയിലേക്കുള്ള ആദ്യ യാത്രാവിമാനം ഇരുവരും ചേര്ന്ന് ഫ്ളാഗ് ഓഫ് ചെയ്യും.
കിയാല് എംഡി വി തുളസീദാസിന്റെ നേതൃത്വത്തിലാണ് കണ്ണൂര് അന്താരാഷ്ട്ര വിമാനത്താവളം ഉദ്ഘാടനത്തിന്റെ അന്തിമഘട്ട ഒരുക്കങ്ങള് നടന്നുവരുന്നത്. അബുദാബിയിലേക്കുള്ള ആദ്യവിമാനത്തിലെ യാത്രക്കാരെ വായന്തോട് ജംഗ്ഷനില് ഞായറാഴ്ച രാവിലെ ആറു മണിക്ക് സ്വീകരിച്ച് എയര്പോര്ട്ടിലെത്തിക്കും. ആദ്യവിമാനത്തിലേക്കുള്ള യാത്രക്കാരെ സ്വീകരിക്കുന്നതിന് വായന്തോട്ട് ഹെല്പ്പ് ഡെസ്ക് പ്രവര്ത്തിക്കും. യാത്രക്കാരെ അലങ്കരിച്ച നാലു ബസുകളില് ഏഴു മണിയ്ക്കകം വിമാനത്താവളത്തിലെത്തിക്കും. ലഗേജുകള് കൊണ്ടപോകുന്നതിനായി പ്രത്യേക വാഹനവും ഏര്പ്പാടാക്കും. ഏഴു മണിക്ക് ടെര്മിനല് കെട്ടിടത്തില് മന്ത്രിമാരുടെയും വിശിഷ്ടാതിഥികളുടെയും നേതൃത്വത്തില് യാത്രക്കാരെ സ്വീകരിക്കും
