തൃശൂര്‍ : കരുവന്നൂര്‍ ബാങ്ക് തട്ടിപ്പിലെ കള്ളപ്പണ ഇടപാടു കേസില്‍ എ.സി.മൊയ്തീന് നാളെ ഇ.ഡി ഓഫിസില്‍ ഹാജരാകും. രണ്ടുവട്ടം നോട്ടീസ് നല്‍കിയിട്ടും ഹാജരാകാതിരുന്ന ശേഷമാണ് നാളെ അന്വേഷണ സംഘത്തിന് മുന്നിലെത്തുന്നത്. ബാങ്കില്‍നിന്ന് ബെനാമികള്‍ക്ക് വ്യാജ വായ്പ അനുവദിക്കുന്നതില്‍ എ.സി മൊയ്തീന് ഇടപെട്ടുവെന്ന് ഇ.ഡിക്ക് മൊഴി ലഭിച്ചിരുന്നു. മൊയ്തീനുമായി അടുത്ത ബന്ധമുള്ള തൃശൂര്‍ കോര്‍പറേഷന്‍ കൗണ്‍സിലര്‍ അനൂപ് ഡേവിസിനെയും വിളിപ്പിച്ചിട്ടുണ്ട്. അന്വേഷണം ഉന്നതരിലേക്ക് കേന്ദ്രീകരിക്കാനാണ് ഇ.ഡിയുടെ നീക്കം.
തട്ടിപ്പിലൂടെ പി സതീഷ് കുമാറിന്റെ കൈവശമെത്തിയ പണത്തിന്റെ വിഹിതം മുന്‍ എം.പി ക്കും ലഭിച്ചുവെന്ന് ഇ.ഡി കണ്ടെത്തി. മുന്‍ എം.പി, എം.എല്‍.എ, ഉന്നത പൊലീസ് ഉദ്യോഗസ്ഥര്‍ എന്നിവരുടെയെല്ലാം ബെനാമിയാണ് സതീഷ് കുമാറെന്ന് മൊഴി ലഭിച്ചിട്ടുണ്ട്. മുന്‍ എം പി ക്ക് പണം നല്‍കിയിട്ടുണ്ടന്ന് സ്ഥിരീകരിക്കുന്ന ഫോണ്‍ സംഭാഷണം സതീഷ് കുമാറിന്റെ ഫോണില്‍ നിന്ന് ലഭിച്ചുവെന്നും അന്വേഷണ സംഘം കോടതിയെ അറിയിച്ചിരുന്നു. കൂടുതല്‍ അറസ്റ്റ് ഈ ദിവസങ്ങളില്‍ ഉണ്ടാകുമെന്നാണ് സൂചന. കരുവന്നൂര്‍ തട്ടിപ്പിലുള്‍പ്പെട്ട മുന്‍ എം.പി പി.കെ.ബിജു വെന്ന ആരോപണവുമായി അനില്‍ അക്കരയും രംഗത്തെത്തിയിരുന്നു.
