തിരുവനന്തപുരം: എല്ലാത്തരം വാത രോഗങ്ങള്ക്കും സമഗ്ര ചികിത്സയുമായി സര്ക്കാര് മേഖലയില് ആദ്യമായി മൂന്ന് മെഡിക്കല് കോളജുകളില് റ്യുമറ്റോളജി വിഭാഗം ആരംഭിക്കുന്നതായി ആരോഗ്യമന്ത്രി വീണാ ജോര്ജ്.
തിരുവനന്തപുരം, കോട്ടയം, കോഴിക്കോട് മെഡിക്കല് കോളജുകളിലാണ് റ്യുമറ്റോളജി വിഭാഗം തുടങ്ങുന്നത്.വാതരോഗ സംബന്ധമായ അസുഖങ്ങള്ക്കും ശരീരത്തിന്റെ പ്രതിരോധശേഷിയെ ബാധിക്കുന്നതുമായ അസുഖങ്ങള്ക്കും അത്യാധുനിക ശാസ്ത്രീയ ചികിത്സ ഉറപ്പാക്കുകയാണ് ലക്ഷ്യം.നിലവില് മെഡിക്കല് കോളജുകളില് റ്യുമറ്റോളജി ക്ലിനിക്കുകള് പ്രവര്ത്തിക്കുന്നുണ്ടെങ്കിലും മെഡിസിന് വിഭാഗത്തിലെ ഡോക്ടര്മാരാണ് ഈ രോഗങ്ങള് ചികിത്സിക്കുന്നത്. പുതുതായി റ്യുമറ്റോളജി വിഭാഗം ആരംഭിക്കുന്നതോടെ റ്യുമറ്റോളജി സ്പെഷലിസ്റ്റിന്റെ സേവനവും കൂടുതല് സംവിധാനങ്ങളും ലഭ്യമാകും.
മാത്രമല്ല കണ്ണ്, ത്വക്ക്, ശ്വാസകോശം തുടങ്ങി വിവിധ ശരീര ഭാഗങ്ങളെ ബാധിക്കുന്ന വാതരോഗങ്ങള്ക്ക് ബന്ധപ്പെട്ട വിഭാഗങ്ങളുമായി ഏകോപിപ്പിച്ച് സമഗ്ര ചികിത്സ ഉറപ്പ് വരുത്താനും ഈ വിഭാഗത്തിലൂടെയാകും.
റ്യുമറ്റോളജി വിഭാഗം ആരംഭിക്കുന്നതോടെ ഭാവിയില് ഡിഎം റ്യുമറ്റോളജി കോഴ്സ് ആരംഭിക്കാനും രംഗത്ത് കൂടുതല് വിദഗ്ധരെ സൃഷ്ടിക്കാനും സാധിക്കുമെന്നും മന്ത്രി പറഞ്ഞു.മനുഷ്യ ശരീരത്തിലെ ഹൃദയം, രക്തക്കുഴല്, സന്ധികള്, പേശികള്, അസ്ഥികള്, ലിഗമെന്റുകള് എന്നിവയെ ബാധിക്കുന്ന രോഗങ്ങളുടെ ചികിത്സയ്ക്കുള്ള ഒരു മെഡിക്കല് ശാസ്ത്ര ശാഖയാണ് റ്യുമറ്റോളജി.ആമവാതം, സന്ധിവാതം, രക്തവാതം, ല്യൂപസ്, ശരീരത്തിന്റെ പ്രതിരോധശേഷിയെ ബാധിക്കുന്ന അസുഖങ്ങള് എന്നിവയാണ് പ്രധാനം വാതങ്ങള്. വാത രോഗങ്ങള് പലപ്പോഴും ദീര്ഘകാല രോഗങ്ങളാണെങ്കിലും ശരിയായ ചികിത്സയിലൂടെ നിയന്ത്രിക്കാനും ഭേദമാക്കാനും കഴിയും. ഇവയ്ക്ക് ശാസ്ത്രീയമായ ചികിത്സ ഉറപ്പ് വരുത്തിയില്ലെങ്കില് സങ്കീര്ണമാകാനിടയുണ്ട്.
സന്ധികളുടെ ചലനക്ഷമത മെച്ചപ്പെടുത്തുന്നതിനും വേദന കുറയ്ക്കുന്നതിനും ഫിസിയോ തെറാപ്പി വിഭാഗത്തിന്റെ സേവനവും റ്യുമറ്റോളജി വിഭാഗം ഉറപ്പ് വരുത്തുന്നുണ്ട്. മെഡിക്കല് ചികിത്സയാണ് അവര് നല്കുന്നത്. മോണോക്ലോണല് ആന്റിബോഡി അടക്കമുള്ള അത്യാധുനിക ചികിത്സയും ലഭ്യമാക്കുന്നു.
