കണ്ണൂര്‍: പയ്യാമ്പലത്ത് ഓടുന്ന കാറിന് മുകളിലേക്ക് ഇലക്ട്രിക്ക് പോസ്റ്റ് മറിഞ്ഞ് വീണ് അപകടം. കാറിലുണ്ടായിരുന്നവര്‍ രക്ഷപ്പെട്ടത് തലനാരിഴയ്ക്ക്. പയ്യാമ്പലം റെഡ്ക്രോസ് റോഡിലായിരുന്നു സംഭവം. കണ്ണൂര്‍ കോര്‍പ്പറേഷന്‍ മേയറുടെ പേഴ്സണല്‍ സ്റ്റാഫ് അംഗമായ അബ്ദുളളയും കുടുംബവുമാണ് കാറിലുണ്ടായിരുന്നത്. അപകടത്തിന്റെ സിസി ടിവി ദൃശ്യങ്ങള്‍ പുറത്തുവന്നിട്ടുണ്ട്. കെഎസ്ആര്‍ടിസി ബസിന് പിന്നിലൂടെ വരുകയായിരുന്ന കാറാണ് അപകടത്തില്‍പ്പെട്ടത്. കാറിന്റെ ബോണറ്റിന്റെ മുകളിലേക്കാണ് പോസ്റ്റ് മറിഞ്ഞ് വീണത്. വൈദ്യുതി കമ്പി കെഎസ്ആര്‍ടിസി ബസില്‍ കുരുങ്ങിയതാകാം പോസ്റ്റ് മറിഞ്ഞ് വീഴാന്‍ കാരണമെന്നതാണ് പ്രാഥമിക നിഗമനം.
