തൊടുപുഴ: സമൂഹത്തില് വര്ധിച്ചു വരുന്ന ലഹരിക്കെതിരെ വിവിധ കര്മ്മ പരിപാടികളുമായി ഗാന്ധിജയന്തി ദിനത്തില് ന്യൂമാന് കോളേജ് ശ്രദ്ധേയമായി. കോളേജിലെ എന്.സി.സി യൂണിറ്റിന്റെ ആഭിമുഖ്യത്തില് ലഹരിക്കെതിരെ സംഘടിപ്പിക്കപ്പെട്ട സന്ദേശയാത്ര, ബോധവല്ക്കരണ ലഘുലേഘ വിതരണം, പ്ലാസ്റ്റിക് നിര്മാര്ജ്ജന പ്രവര്ത്തനങ്ങള്, വൃക്ഷ തൈ നടീല് എന്നിവ പൊതു ജനശ്രദ്ധയാകര്ഷിച്ചു.
ലഹരിക്കെതിരെ തൊടുപുഴ മടക്കത്താനത്ത് നിന്ന് ആരംഭിച്ച ലഹരി വിരുദ്ധ സന്ദേശ യാത്ര മൂവാറ്റുപുഴ ബ്ലോക്ക് പഞ്ചായത്ത് പ്രസിഡണ്ട് ഡോ. ജോസ് അഗസ്റ്റിന് ഉദ്ഘാടനം ചെയ്തു. ചടങ്ങില് മഞ്ഞള്ളൂര് പഞ്ചായത്ത് മെമ്പര് രതീഷ് മോഹനന്, കോളേജ് എന്.സി.സി ഓഫീസര് ക്യാപ്റ്റന് പ്രജീഷ് സി.മാത്യു, സിവില് എക്സ്സൈസ് ഓഫീസര് ബാബു എം. ടി, സീനിയര് അണ്ടര് ഓഫീസര് ജോമി ജോര്ജ്, കേഡറ്റ് അന്നു മരിയ എന്നിവര് പ്രസംഗിച്ചു.
പഞ്ചായത്തിന്റെ വിവിധ ഭാഗങ്ങളില് ലഹരിയുടെ ചതിക്കുഴികളെ വിശദീകരിക്കുന്ന ലഘുലേഖകള് വിതരണം ചെയ്തു. മണിയന്ത്രം മൈമ ആര്ട്സ് ആന്ഡ് സ്പോര്ട്സ് അംഗങ്ങളുടെ നേതൃത്വത്തില് നടന്ന വൃക്ഷതൈ നടീല് പഞ്ചായത്ത് അംഗം രതീഷ് മോഹനന് ഉത്ഘാടനം ചെയ്തു.
തുടര്ന്ന് മണിയന്ത്രം മലയില് എത്തിയ കേഡറ്റുകള് പ്ലാസ്റ്റിക് മാലിന്യ നിര്മ്മാര്ജ്ജനത്തിന് നേതൃത്വം നല്കി. യുവജനങ്ങള്ക്കിടയില് വര്ദ്ധിച്ചു വരുന്ന ലഹരിയുടെ ഉപയോഗത്തെ തടയുവാന് വ്യത്യസ്തമായ കര്മ്മപരിപാടികള് കോളേജ് ആവിഷ്കരിച്ചിട്ടുണ്ട് എന്ന് പ്രിന്സിപ്പല് ഡോ.ബിജിമോള് തോമസ് അറിയിച്ചു. പ്രവര്ത്തനങ്ങള്ക്ക് അണ്ടര് ഓഫീസര് അമല് രവീന്ദ്രന് സിറ്റി, സഫ്വാന ഫാത്തിമ, ജോര്ജ് ഹെന്ട്രി, അഭിരാം എസ് ചെറിയാന് കെ. ബിജു, എം.കൃഷ്ണഗാഥാ, സ്റ്റെബിമോള് സെബാസ്റ്റ്യന് എന്നിവര് നേതൃത്വം നല്കി.