തിരുവനന്തപുരം: ദിത്‌വ ചുഴലിക്കാറ്റിന്റെ സ്വാധീനം മൂലം തിരുവനന്തപുരത്ത് അസാധാരണ തണുപ്പ്. സാധാരണ നിലയേക്കാൾ 4 മുതൽ 8 ഡിഗ്രി വരെ കുറവ് താപനിലയാണ് അനുഭവപ്പെടുന്നത്. കൊല്ലം പുനലൂരിലാണ് ഏറ്റവും കുറഞ്ഞ താപനില.
അതേസമയം, ദിത്‌വ ചുഴലിക്കാറ്റ് തമിഴ്നാട് തീരം തൊടില്ല. ശക്തി ക്ഷയിച്ച് ന്യൂനമർദമാകാൻ സാധ്യതയെന്നും കേന്ദ്ര കാലാവസ്ഥ വകുപ്പ് അറിയിച്ചു. ദിത്വാ ചുഴലിക്കാറ്റ് തീരം തൊടുമെന്ന സൂചനയെ തുടർന്ന് തമിഴ്നാട്, പുതുച്ചേരി, ആന്ധ്രാപ്രദേശ് എന്നിവിടങ്ങളിൽ റെഡ് അലേർട്ട് പ്രഖ്യാപിച്ചു.
ഞായറാഴ്ച പുലർച്ചയോടെ ചുഴലിക്കാറ്റ് വടക്ക്-വടക്കുപടിഞ്ഞാറ് ദിശയിലേക്ക് നീങ്ങുകയും വടക്കൻ തമിഴ്നാട്, പുതുച്ചേരി, തെക്കൻ ആന്ധ്രാപ്രദേശ് തീരങ്ങൾക്ക് സമീപം തെക്ക് പടിഞ്ഞാറൻ ബംഗാൾ ഉൾക്കടലിലേക്ക് അടുക്കുകയും ചെയ്യും. ശ്രീലങ്കയിൽ ദിത്‌വയിൽ വലിയ വെള്ളപ്പൊക്കം ഉണ്ടായി. 153-ലധികം പേർ കൊല്ലപ്പെടുകയും 171 ലധികം പേരെ കാണാതാവുകയും ചെയ്തു. ആയിരക്കണക്കിന് ആളുകളെ മാറ്റിപ്പാർപ്പിച്ചു . രക്ഷാപ്രവർത്തനം തുടരുകയാണ്. കെലനി നദിയിൽ ജലനിരപ്പ് ഉയർന്നതോടെ കൊളംബോ പ്രളയഭീതിയിലാണ്. ശ്രീലങ്കയില്‍ ഡിസംബർ 16 വരെ സ്കൂളുകൾ അടച്ചിടും.
