തിരുവനന്തപുരം: ട്രോളന്മാരെ തളയ്ക്കാന്‍ നിയമനിര്മാണം വേണമെന്ന ആവശ്യവുമായി പി.കെ. ശശിയും പി.സി. ജോര്ജും. ചൊവ്വാഴ്ച ചോദ്യോത്തരവേളയിലായിരുന്നു ഇരുവരുടെയും ആവശ്യം. ആവശ്യം കേട്ടപാടെ നിയമസഭയില് കൂട്ടച്ചിരി പടര്ന്നു.
സമൂഹമാധ്യമങ്ങളെ ഉപയോഗപ്പെടുത്തി ചില ഓണ്ലൈന് മാധ്യമങ്ങള് എന്ത് വൃത്തികേടും പറയുന്ന അവസ്ഥയാണെന്നും ഇവരുടെ ആക്രമണത്തിന് വിധേയരാവാത്ത എത്രപേര് നിയമസഭയിലുണ്ടാകുമെന്നും ശശി ചോദിച്ചു. വായില് വിരലിട്ടാല് കടിക്കാത്ത ആറോ ഏഴോ പേരുണ്ടാകും. ശശി വിമര്ശനമുന്നയിക്കുകയും ചെയ്തു.
ചില ട്രോളന്മാര് ഉണ്ട്. വല്ലാത്ത രൂപത്തിലാണ് ഇവന്മാരുടെ ആക്രമണം. ആളെ തിരിച്ചറിയാന് കഴിയാത്ത നമ്ബറില്നിന്ന് ഫോണ്കോളുകളും സന്ദേശങ്ങളും വരുകയാണെന്നും പലരും ആത്മഹത്യയുടെ വക്കിലാണെന്നും ശശി പറഞ്ഞതോടെ സഭയിലാകെ കൂട്ടച്ചിരി പടര്ന്നു. ഇത്തരം പ്രവര്ത്തനങ്ങള്ക്ക് തടയിടാന് നിയമനിര്മാണത്തിന് സര്ക്കാര് തയാറാകുമോയെന്നും പി.കെ. ശശി മുഖ്യമന്ത്രി പിണറായി വിജയനോട് ചോദിച്ചു.
സമൂഹത്തില് നിലനില്ക്കുന്ന വലിയൊരു പ്രശ്നമാണ് അംഗം ചൂണ്ടിക്കാട്ടിയതെന്നും എന്നാല്, ഇക്കാര്യത്തില് കേരളത്തിന് മാത്രമായി ഒന്നും ചെയ്യാനാകില്ലെന്നും അദ്ദേഹം പറഞ്ഞു. പല വിഷയങ്ങളിലും ആരോഗ്യകരമായ നിലപാടുകളാണ് സമൂഹമാധ്യമങ്ങള് സ്വീകരിച്ചത്. ചില നെഗറ്റിവ് ഇടപെടലുകളും ഉണ്ടായിട്ടുണ്ട്. അതുകൊണ്ടുമാത്രം സമൂഹമാധ്യമങ്ങളെ നിയന്ത്രിക്കാന് കഴിയില്ല. മുഖ്യമന്ത്രി വ്യക്തമാക്കി.
