തിരുവനന്തപുരം: മുത്തലാഖ് ബില് ചര്ച്ചയില് മലപ്പുറം എംപിയും മുസ്ലിം ലീഗ് നേതാവുമായ പി കെ കുഞ്ഞാലിക്കുട്ടി പങ്കെടുക്കാത്തത് വലിയ വിവാദങ്ങള്ക്കും വിമര്ശനങ്ങള്ക്കുമാണ് വഴിവെച്ചിരിക്കുന്നത്.
ചര്ച്ചയില് പങ്കെടുക്കാതെ വിവാഹ പാര്ട്ടിയില് പങ്കെടുത്തതിനെ വിമര്ശിച്ച് കുഞ്ഞാലിക്കുട്ടിക്കെതിരെ സോഷ്യല് മീഡിയയിലാകെ പൊങ്കാലയാണ്. കുഞ്ഞാലിക്കുട്ടിയുടെ ഫേസ്ബുക്ക് പേജിലടക്കം നിരവധി പേരാണ് വിമര്ശനവും ട്രോളുമായി എത്തിയിരിക്കുന്നത്. മുത്തലാഖ് ബില് ലോക്സഭയില് അവതരിപ്പിക്കുന്നത് മാസങ്ങള്ക്ക് മുന്നേ തീരുമാനിച്ച കാര്യമാണ്. എന്നിട്ടും എംപി പങ്കെടുക്കാത്തത് ശരിയല്ലെന്നാണ് അണികളടക്കം വിമര്ശിക്കുന്നത്. ഇടി മുഹമ്മദ് ബഷീറിനെ പ്രശംസിക്കുകയും കുഞ്ഞാലിക്കുട്ടിയെ വിമര്ശിക്കുന്നതുമാണ് കമന്റുകളെല്ലാം.
ലോക്സഭയില് മുത്തലാഖ് ബില് ചര്ച്ചയില് പങ്കെടുക്കാതെ പി കെ കുഞ്ഞാലിക്കുട്ടി എംപി പോയത് വ്യവസായി ഒരുക്കിയ വിരുന്നിനാണ്. ബില്ലിന്മേലുള്ള ചര്ച്ച നടക്കുമ്പോള് പാര്ട്ടി നേതാവ് കൂടിയായ മലപ്പുറം പുത്തനത്താണിയിലുള്ള സുഹൃത്തിന്റെ മകന്റെ വിവാഹ സല്ക്കാരത്തില് പങ്കെടുക്കുകയായിരുന്നു മുസ്ലിം ലീഗ് ദേശീയ ജനറല് സെക്രട്ടറിയെന്നാണ് വിമര്ശനം
