കെ.എസ്.ആര്.ടി.സിക്ക് മുന്നില് സ്കൂട്ടറില് ധൈര്യത്തോടെ നിലയുറപ്പിച്ച ഒരു യുവതിയുടെ വീഡിയോ കഴിഞ്ഞ ദിവസങ്ങളില് സോഷ്യല് മീഡിയയില് വൈറലായിരുന്നു. ചലച്ചിത്ര താരം ഉണ്ണി മുകുന്ദന് ഉള്പ്പെടെ യുവതിയെ അനുകൂലിച്ചു രംഗത്തെത്തി. എന്നാല്, യുവതിക്കുനേരെയും വിമര്ശനങ്ങള് ഉയര്ന്നിരുന്നു. നിയമലംഘനം നടത്തിയെന്നുള്ള പരാമര്ശം ഉണ്ടായി.
പെരുമ്പാവൂര് ഇരിങ്ങോല് വടക്കരേടത്ത് മനീഷിന്റെ ഭാര്യ സൂര്യയാണ് സോഷ്യല് മീഡിയയില് വൈറലായ ആ യുവതി. പെരുമ്പാവൂരിലെ ഫോട്ടോപാര്ക്ക് സ്റ്റുഡിയോയില് ജീവനക്കാരിയാണ് സൂര്യ. ജോലി കഴിഞ്ഞ് വീട്ടിലേക്ക് മടങ്ങുമ്പോഴാണ് ഈ സംഭവം ഉണ്ടായതെന്ന് യുവതി പറയുന്നു.
കുട്ടികളെ ഇറക്കുകയായിരുന്ന ഒരു സ്കൂള് ബസിന് പിന്നില് നിര്ത്തിയിട്ടിരിക്കുകയായിരുന്നു സൂര്യയുടെ സ്കൂട്ടര്. ആ ബസ് വലത്തോട്ട് പോയപ്പോള് മറ്റൊരു ബസിനെ മറികടന്നെത്തിയ കെ.എസ്.ആര്.ടി തന്റെ മുന്നിലെത്തുകയായിരുന്നെന്ന് സൂര്യ പറയുന്നു.
പെട്ടെന്ന് മുന്നിലെത്തിയ ബസ് കണ്ടപ്പോള് ആദ്യം പകച്ചു. എന്നാല് ധൈര്യപൂര്വം അവിടെത്തന്നെ നില്ക്കുകയായിരുന്നു. അതേസമയം വീഡിയോയ്ക്കുള്ള കമന്റുകളില് പറയുന്നത് പോലെ നിയമ ലംഘനം നടത്തുകയോ ബോധപൂര്വം ബസ് തടയുകയോ ചെയ്തിട്ടില്ല. ഡ്രൈവര് ചിരിച്ച് കൊണ്ട് ഇടതുവശത്തേക്ക് മാറ്റിയാണ് ബസും കൊണ്ട് പോയത്’ സൂര്യ വ്യക്തമാക്കുന്നു. അതേസമയം ഈ വിഡീയോ എവിടെ നിന്നുള്ളതാണെന്നോ ആരാണ് ചിത്രീകരിച്ചതെന്നും വ്യക്തമല്ല.